Qazaqstan Respýblikasynyń Premer-ministri Oljas Bektenov Sheteldik investorlar keńesiniń aralyq otyrysyn ótkizdi. Elimizdegi investorlar qyzmetiniń ózekti máseleleri, olardyń elishilik qundylyqty damytýǵa qosqan úlesi qaraldy, dep habarlaidy Dalanews.kz.
Memleket basshysynyń tapsyrmasy boiynsha Úkimet biznes ahýaldy jaqsartý, ekonomikany ártaraptandyrý qarqynyn arttyrý boiynsha júieli sharalar qabyldaýda. Bul kapitaldyń qosymsha aǵynyn qamtamasyz etýge, resýrstyq áleýetti arttyrýǵa jáne jańa ónerkásip óndirisin iske qosýǵa múmkindik beredi.
Premer-ministr ekonomikanyń basym salalarynda jańa jobalardy júzege asyrý, tereń lokalizatsiialaýdy qamtamasyz etý jáne halyqty jumyspen qamtýdy keńeitý úshin investorlarmen tyǵyz ózara is-qimyl júrgizýge basa nazar aýdardy.
"Memleket basshysy qazirgi geosaiasi jáne ekonomikalyq jaǵdaida jeke investitsiialar tartý arqyly kásipkerlik belsendilikti arttyrý úshin qolaily orta qurý basym baǵyt ekenin atap ótken bolatyn. Biz sizdermen Qazaqstanda jumyspen qamtýdy arttyrýǵa jáne tereń lokalizatsiialaýǵa yqpal etetin jańa óndiris oryndaryn qurýǵa múddelimiz. Yntymaqtastyqtyń jańa baǵyttarynyń áleýetin ashý jáne ekonomikanyń basym sektorlarynda serpindi jobalardy iske asyrý mańyzdy. Ol úshin bizde barlyq jaǵdai jasalǵan. Qazaqstan Úkimeti syndarly dialogqa ashyq jáne elimizdiń damýyna yqpal etetin sheshimderdi birlesip júzege asyrýǵa daiyn", — dep atap ótti Oljas Bektenov.
Otyrys barysynda investitsiialyq saiasatty júzege asyrý; densaýlyq saqtaý jáne farmatsevtika ónerkásibin damytý; energetika, ekologiia jáne munai-gaz salasy; eńbek zańnamasy, adami kapitaldy damytý; tsifrlandyrý máseleleri boiynsha birlesken jumys toptarynyń baiandamalary tyńdaldy.
"Qazaqstandyq sheteldik investorlar keńesi" qaýymdastyǵynyń basqarma tóraǵasy, Ortalyq Aziia men Kavkaz elderindegi EY basqarýshy seriktesi Erlan Dosymbekov, ExxonMobil Kazakhstan Inc. basqarýshy direktory Sesil Rolin, "Knaýf Gips Qapshaǵai" JShS Qazaqstan, Qyrǵyzstan jáne Tájikstan respýblikalarynda marketing jáne ótkizý jónindegi direktory Dimitrii Propp, KPMG Caucasus and Central Asia basqarýshy seriktesi ári atqarýshy direktory Sáken Jumashev, "Himfarm" AQ bas direktory Adam Alekseiýk, Eýropa qaita qurý jáne damý bankiniń basqarýshy direktory Hýsein Ózhan sóz sóiledi.
Spikerler aldaǵy jumys ekologiialyq retteýdi, "bultty" tehnologiialar men jasandy intellektini, kóshi-qon normalaryn jetildirýge, jer qoinaýyn paidalaný salasyndaǵy protsesterdi tsifrlandyrýǵa, Kaspii teńizi deńgeiiniń tómendeýi máselesi boiynsha vedomstvoaralyq úilestirýdi kúsheitýge, densaýlyq saqtaýǵa investitsiialar men tehnologiialardy tartýǵa baǵyttalatynyn atap ótti.
Investorlar kótergen máseleler boiynsha Ulttyq ekonomika, Energetika, Eńbek jáne halyqty áleýmettik qorǵaý, Tsifrlyq damý, innovatsiialar jáne aeroǵarysh ónerkásibi, Densaýlyq saqtaý ministrlikteriniń basshylary túsindirme berdi.
Máselen, Qazaqstanda biznes ahýaldy jaqsartý boiynsha birqatar júieli sharalar júzege asyrylýda.
Jergilikti jetkizýshilerdi qoldaýdy jáne olardy qosylǵan qun tizbegine biriktirýdi kózdeitin "Ónerkásiptik saiasat týraly" Zań qabyldandy. Turaqty biznes-ekojúieni qalyptastyrýǵa baǵyttalǵan 2029 jylǵa deiingi Investitsiialyq saiasat tujyrymdamasy ózektendirildi. Jobalardy iske asyrý kezeńderin jeńildetetin ulttyq tsifrlyq investitsiialyq platforma iske qosyldy. Infraqurylymdyq qoldaý qamtamasyz etildi – investorlarǵa arnaiy ekonomikalyq, indýstriialyq jáne shaǵyn ónerkásiptik aimaqtardaǵy daiyn óndiristik alańdar usynylady. Jumys istep turǵan óndiristerdi júkteý jáne jańa qatysýshylardy tartý úshin uzaqmerzimdi sharttar men offteik-kelisimsharttar jasasý boiynsha jumys júrgizilýde.
Otyrys qorytyndysy boiynsha Premer-ministr memlekettik organdar men uiymdarǵa aitylǵan máseleler men usynymdardy pysyqtaýdy tapsyrdy.
