Premer-ministr Oljas Bektenov Prezident tapsyrmalary aiasynda ekonomikany monopoliiasyzdandyrý jónindegi komissiia otyrysyn ótkizip, birqatar júieli sharalardy iske asyrýdy tapsyrdy, dep habarlaidy Dala News.
Jiynda Memleket basshysy Qasym-Jomart Toqaevtyń ekonomikany yryqtandyrý, básekelestikti damytý jáne túrli naryqtardaǵy kedergilerdi joiý boiynsha tapsyrmalarynyń oryndalý barysy qaraldy. Ásirese densaýlyq saqtaý, bailanys, elektr energetikasy jáne tabiǵi monopoliialar salasyna erekshe nazar aýdaryldy.
Komissiia dári-dármekterdi naryqqa shyǵarý merzimin qysqartý máselesin talqylady. Qazirgi ýaqytta bul protsess 3–5 jylǵa sozylsa, ony 100 jumys kúnine deiin qysqartý josparlanyp otyr. Osy baǵytta Densaýlyq saqtaý ministrligi «biryńǵai tereze» qaǵidaty boiynsha qyzmet engizýde.
Sonymen qatar tsifrlyq infraqurylymdy damytý máseleleri qaraldy. Mobildi qurylǵylardy verifikatsiialaý, derekterdi sáikestendirý jáne telekommýnikatsiialar naryǵyn jetildirý boiynsha zańnamalyq ózgerister usynyldy.
Jiynda elektr energiiasyn biryńǵai satyp alýshynyń jumysy, tariftik saiasat jáne temirjol infraqurylymyndaǵy problemalar da kóterildi.
Otyrys qorytyndysy boiynsha Premer-ministr memlekettik organdarǵa naqty tapsyrmalar júktedi. Atap aitqanda, Qarjy ministrligine memlekettik múlik tizilimin jańartý, Ulttyq ekonomika ministrligine baǵa men tarifti shekteitin normalardy alyp tastaý, al Densaýlyq saqtaý ministrligine dári-dármek júiesin tsifrlandyrýdy jedeldetý tapsyryldy.
Sondai-aq tsifrlyq damý ministrligine mobildi qurylǵylardy mindetti verifikatsiialaý boiynsha zańnamalyq ózgerister qabyldaý júkteldi. Al «Samuryq-Qazyna» qoryna satyp alý júiesin jetildirý tapsyryldy.
