Qazaqstanda memlekettik eltańbany ózgertý máselesi boiynsha sarapshylar pýly qurylýy múmkin, dep habarlaidy Dalanews.kz.
Bul týraly premer-ministr Oljas Bektenov málimdedi. Onyń aitýynsha, qazirgi tańda ár saladan arnaiy mamandar jasaqtalyp jatyr.
"Búginde Memleket basshysy Qasym-Jomart Toqaevtyń Ulttyq Quryltaida alǵa qoiǵan mindetterin júzege asyrý boiynsha keshendi is-sharalar jospary bekitildi. Qazirgi tańda memlekettik eltańbany ózgertý máselesin talqylaý úshin depýtattar men qoǵam qairatkerleri, tarih, filologiia, arheologiia, antropologiia jáne áleýmettaný salasynyń ǵalymdary arasynan sarapshylar toby jasaqtalyp jatyr. Barlyq aspektini obektivti qarastyrý úshin ortaq pikirge kelsek, Mádeniet jáne aqparat ministrligi janynan komissiia qurý josparlanýda", - dedi Bektenov Májilis depýtattarynyń saýalyna jaýap bere otyryp.
Eske salaiyq, buǵan deiin Ulttyq quryltaida Memleket basshysy Qasym-Jomart Toqaev Eltańabany ózgertý kerek ekenin, ol Keńes zamanyndaǵy Gerbke uqsap qalatynyn málimdegen edi.
Bul usynystan keiin qoǵamda Eltańbaǵa qatysty qyzý pikirtalas bastalyp ketti.
Dalanews.kz tilshisi sarapshylarmen suhbattasyp, áleýmettik jelidegi osy taqyryptaǵy jazbalarǵa da sholý jasady.
Prezident Eltańbaǵa qatysty pikirinde "ekletika" sózin qoldanady. Bul sózdiń ashyq derekkózdegi maǵynasyna nazar aýdarsaq, arhitektýra men beineleý ónerine alýan úlgidegi kórkem óner elementterin tutastai talǵamsyz qoldaný degendi bildiredi eken.
"Eltańbamyzǵa qatysty syni pikirler aitylyp qalady. Ony Keńes zamanyndaǵy Gerbke uqsatyp jatady. Tym eklektikalyq, kúrdeli deidi. Mundai oidy el isine bei-jai qaramaityn belsendi azamattar ǵana emes, mamandar da aityp júr. Oryndy paiymdar eskerýsiz qalmaýy kerek.
Ortaq kelisimge kelgen jaǵdaida arnaýly komissiia qurýǵa bolady. Bul komissiia máseleni jan-jaqty qarastyryp, qoǵamdyq talqylaý ótkizedi. Sosyn Qazaqstannyń jańa Eltańbasynyń jobasyn jasaýǵa ashyq baiqaý jariialanady", - dedi Toqaev.
Al tarihshy, professor Bereket Káribaev Eltańbada kóńilge jaqpaityn eshteńe joq degen pikirde.
"Jeke óz basym QR Eltańbasynan sóket, kóńilge jaqpaityn esh nárse kórip otyrǵan joqpyn. Osy ideiany prezidentke usynǵan keńesshilerden suraý kerek. Menińshe, Gerbti ózgertkenmen eshteńe ózgermeidi, oǵan ketetin aqyl-oi men kúsh- jigerdi, barlyq materialdyq, qarjylai shyǵyndardy basqa maqsatqa, baǵytqa jumsaý kerek", - dedi professor.
Sarapshy Baiaýjuma Asylbek bul talasqa pikir bildirdi.
"Jalpy ózim Eltańbany ózgertýge qarsymyn. Birinshiden, Eltańbada 40-tan asa element bar. Ýyqtan, shańyraqtan bastap pyraqqa deiin búkil ulttyq bolmysymyzdy, qazaqilyǵymyzdy, tarihty kórsetip turǵan dúnie. Bes juldyz Qytaidyń da, Túrkiianyń da, Amerikanyń da týynda bar. Bes juldyz qazaqtyń juldyzy jarqyrai bersin, biikte tursyn degendi bildiredi. Temirqazyq degen juldyz bar. Sony bildiredi. Sondyqtan dál qazirgi ýaqytta memlekettik rámizderdi ózgertýdiń eshqandai qajeti joq.
1991 jyly bizdi atamekenge sonaý Mońǵoliiadan shaqyryp ákelgen osy kók Tý men Eltańbamyz bolatyn. Eltańba men kók Tý júregimizge óte jaqyn.
Mamandar eseptep jatyr ǵoi, Eltańbany aýystyrýdyń ózinde milliardtaǵan teńge qarajat qajet bolady. Barlyq balabaqshadan bastap memlekettik mekemelerdiń Eltańbalaryn aýystyrýǵa týra keledi. Bul da qiyn ekonomikalyq daǵdarys tusynda eshqandai paidasyz dúnie.
Bizdiń Eltańbamyz Amerikanyń halyqaralyq zertteýinde eń ásem Eltańba retinde 9-oryndy alady. Sondyqtan biz kerisinshe memlekettik rámizderimizdi jastarǵa nasihattaýymyz kerek. Eltańba men Týymyz brend bolyp ketken, osy arqyly búkil dúniejúzi tanidy.
...Eltańbany ózgertý týraly bastamasyn qoldamaimyn. Bul - Prezidenttiń emes, oǵan aityp otyrǵan bir top adamnyń ideiasy. Paida kózdegen de bolýy múmkin. Ekinshi jaǵy ózderiniń abyroilaryn shyǵarýdy kózdegen bolar", - deidi sarapshy.
