Úkimette premer-ministr Oljas Bektenovtiń tóraǵalyǵymen avtokólik joldarynyń sapasyn arttyrý máseleleri boiynsha jiyn ótti, dep habarlaidy Dalanews.kz.
Premer-ministr Oljas Bektenov elimizdegi joldar jelisin odan ári damytý qajettigin atap ótti. 2030 jylǵa deiin 4 myń shaqyrymǵa jýyq avtojol qaita jańǵyrtylady.
"Biyl birqatar negizgi jobany aiaqtaý josparlanyp otyr, bul rette jobalyq qujattamanyń daiyndyǵy joǵary jańa jobalardy: Aqtóbe – Ulǵaisyn, Qaraǵandy – Jezqazǵan, Atyraý – Dossor joldary men Saryaǵash, Petropavl, Rýdnyi jáne Qyzylorda qalalaryn ainalyp ótý joldaryn, sondai-aq, 2,5 myń shaqyrym avtojoldy ortasha jóndeý mańyzdy", - dedi Bektenov.
Kólik, Qarjy ministrlikterine jáne QazAvtoJolǵa merdigerlerdi qarjylandyrý men aiqyndaýdy qamtamasyz etý, al Ónerkásip jáne qurylys, Kólik ministrlikterine "kiltti tapsyrǵanǵa deiingi" iri jobalardy jedel júzege asyrý úshin memlekettik saraptama men qurylys-montajdaý jumystarynyń qatar ótý tetigin ázirleý jáne bekitý tapsyryldy.
Oljas Bektenov shuǵyl sheshýdi qajet etetin máselelerge nazar aýdardy. Jetisý, Almaty oblystaryn qosa alǵanda, Ulttyq sapa ortalyǵy tarapynan eskertýlerge qaramastan nysandardy qabyldaý tájiribesi jalǵasyp jatqan óńirler ataldy.
Merdigerlerdiń kepildikterin qadaǵalaý jáne sapasyz materialdardy paidalaný máseleleri atap ótildi. Mysal retinde, Pavlodar tas jolynyń beton tósemi kóterilip jatqany ataldy, Soltústik Qazaqstan oblysynda tekserilgen synamalardyń 43%-y sapa standarttaryna sáikes kelmegen. Eldi mekenderdegi turǵyndar tarapynan jol sapasyna qatysty eń kóp syn Atyraý jáne Túrkistan oblystarynda tirkelgen.
Premer-ministr kepildik merzimin ulǵaitýdy jáne merdigerlerdiń kepildik mindettemelerin sapasyz oryndaǵany úshin merdigerlik uiymdar jaýapkershiligin kúsheitýdi tapsyrdy.
Premer-ministr edáýir kólemde biýdjet qarajaty bólingenine qaramastan, keibir óńirlerde ony igerý baiaý júrip jatqanyn atap ótti. Máselen Abai oblysynda – 42%, Aqtóbede – 52%, Aqmolada – 56% igerilgen.
"Joǵaryda kórsetilgen zań buzýshylyqtardy eskere otyryp, Kólik ministrligine jáne Ulttyq sapa ortalyǵyna 1 qazanǵa deiin barlyq avtojol jobalarynyń júzege asyrylýyn tekserýdi tapsyramyn. Onyń qorytyndysynda anyqtalǵan kinálilerdi jazalaý boiynsha esep pen usynystar engizilsin. Kólik jáne Qarjy ministrlikterine Ulttyq sapa ortalyǵynyń qyzmetin kúsheitý boiynsha sheshimder daiyndaýdy tapsyramyn", - dep atap ótti Oljas Bektenov.
