Premer-mınıstr Pavlodar oblysyna jumys sapary barysynda Prezıdenttiń energetıka salasyna qatysty tapsyrmalarynyń oryndalý barysyn tekserdi. Oljas Bektenov Ekibastuzda GRES-1-di jańǵyrtý nátıjelerimen, taza kómir tehnologıasyn paıdalana otyryp, GRES-2-ni rekonstrýksıalaý jáne GRES-3 stansasy qurylysy jobalaryn júzege asyrýdyń bastalýymen tanysty.
Munda ekonomıkanyń ósip kele jatqan qajettilikteri, jańa óndiris oryndaryn iske qosý jáne belsendi sıfrlandyrý aıasynda salany damytý máseleleri boıynsha respýblıkalyq keńes ótti, – dep habarlaıdy Dalanews.kz.
Bolat Nurjanov atyndaǵy GRES-1 jáne GRES-2 quramyna kiretin Ekibastuz energıa toraby nysandarynyń jalpy belgilengen qýaty 5 myń MVt-qa jetedi, bul Ekibastuzdy elektr energıasyn óndirýde strategıalyq mańyzdy ortalyqqa aınaldyrady. Jalpy, Pavlodar oblysy respýblıkadaǵy elektr energıasynyń 40%-dan astamyn óndiredi. GRES-1-di jańǵyrtý aıasynda ótken jyldyń jeltoqsan aıynda qýaty 540 MVt bolatyn №1 energoblok qalpyna keltirilip, paıdalanýǵa berildi. 2026-2028 jyldary otynmen qamtamasyz etý júıelerin rekonstrýksıalaý jáne jańa tútin murjasyn salý josparlanyp otyr. Sonymen qatar prosesterdi avtomattandyrý, shyǵaryndylardy baqylaý jáne qandaı da bir oqys oqıǵalardyń aldyn alý boıynsha baıandama jasaldy.
Premer-mınıstr Oljas Bektenovtiń tóraǵalyǵymen ótken energetıkany damytý máseleleri jónindegi respýblıkalyq keńeste salanyń negizgi baǵyttary, onyń ishinde jańa qýat kózderin iske qosý, ınfraqurylymdy jańǵyrtý, Batys aımaqtyń elektr jelilerin elimizdiń Biryńǵaı elektr energetıkalyq júıesimen biriktirý, energıa tıimdiligin arttyrý jáne basqa da máseleler qaraldy. Energetıka mınıstri Erlan Aqkenjenov, ónerkásip jáne qurylys mınıstri Ersaıyn Naǵaspaev, «Samuryq-Energo» AQ jáne «KEGOC» AQ kompanıalary basshylyǵy, sondaı-aq birqatar óńir ákimderi baıandama jasady.
Qazaqstanda 227 elektr stansasy jumys isteıdi. Stansa jabdyqtarynyń ortasha tozý deńgeıi 56%-ǵa jetedi. Ótken jyldyń qorytyndysy boıynsha elektr energıasyn óndirý kólemi 4%-ǵa ósti. Jańa qýat kózderin iske qosý qoldanystaǵy stansalardy jańǵyrtý jáne jańa generasıalaıtyn qondyrǵylar salý esebinen boljanýda. Energetıka mınıstri Erlan Aqkenjenov ótken jyly 771 MVt jańa qýat kózi, onyń ishinde Ekibastuz GRES-1-degi №1 blok qalpyna keltirilgenin, Atyraý JEO-daǵy №6 týrbına, Jezqazǵan qalasyndaǵy JEO-da №8 qazandyq aýystyrylǵanyn, sondaı-aq jalpy qýaty 163 MVt balamaly energetıka jobalary iske qosylǵanyn aıtty. Generasıalaıtyn qondyrǵylardy jańǵyrtýǵa, keńeıtýge, rekonstrýksıalaýǵa jáne jańartý boıynsha jalpy qýaty shamamen 2 GVt bolatyn 14 ınvestısıalyq kelisim jasaldy.
Bıyl 621 MVt, 2026 jyly – 2,6 GVt iske qosý josparlanǵan. Ekonomıkanyń elektr energıasyna degen qajettiligin óteý úshin 2029 jylǵa deıin 68 joba júzege asyrylady. Jalpy, 2035 jylǵa deıin jalpy qýaty 4,2 GVt qoldanystaǵy stansalardy jańǵyrtý, rekonstrýksıalaý jáne keńeıtý josparlanyp otyr.
Sonymen qatar Aqtóbe, Batys, Sarybaı júıearalyq elektr jelileri KEGOC fılıaldarynyń 220-500 kV áýe jelisin rekonstrýksıalaý jobasy aıaqtaldy, onyń sheńberinde normatıvtik paıdalaný merzimine jetken jalpy uzyndyǵy 2 myń shaqyrymdy quraıtyn qoldanystaǵy 24 elektr berý jelisine jóndeý júrgizildi. Sondaı-aq Almaty JEO-2 jáne JEO-3-ti jańǵyrtý jumystarynyń barysy týraly aıtyldy.
Ónerkásip jáne qurylys mınıstri Ersaıyn Naǵaspaev elimizdiń iri kásiporyndarymen ekonomıkanyń energıa syıymdylyǵyn jáne energıa tutynýdy tómendetý boıynsha júrgizilip jatqan jumystar týraly baıandady. İske asyrylǵan birqatar joba ataldy. «KarSement» kásipornyndaǵy sorǵy jabdyqtaryn jańǵyrtý elektr energıasynyń úlestik shyǵynyn 15,4%-ǵa tómendetýge múmkindik berdi. Qazaqstan elektrolız zaýyty elektrolızerler men oqshaýlanǵan elektr qazandyqtaryn kúrdeli jóndeýden ótkizip, elektr energıasyn tutynýdy 4,5%-ǵa azaıtty. Aqtóbe mys kompanıasy gaz porshendi qondyrǵylar jumysyn ońtaılandyrý jáne otyn qospasyn berýdi retteý arqyly elektr energıasynyń shyǵynyn 2%-ǵa qysqartty. Sondaı-aq búdjettik sektordyń energıa tutynýyna monıtorıń júrgizilýde. Sıfrlandyrý sheńberinde Memlekettik energetıkalyq tizilim energıa únemdeý salasyndaǵy Biryńǵaı aqparattyq júıege transformasıalanýda.
«Prezıdent energetıkany ózin-ózi qamtamasyz etetin ári básekege qabiletti el qurýdyń negizgi baǵyttarynyń biri retinde atady. Bul tabysty sıfrlandyrý men jasandy ıntellektini keńinen engizý – oǵan tikeleı táýeldi bolatyn jańa álemdegi turaqty ilgerileýdiń negizgi faktory. Bul jerde Memleket basshysy atap ótkendeı, Qazaqstanda orasan zor múmkindikter bar. Sonymen qatar josparlanǵan jobalardyń ýaqtyly oryndalmaýy ekonomıkanyń damýyn tejeıdi. Mundaı jaǵdaıǵa jol berýge bolmaıdy. Biz belsendi túrde jumys isteýimiz kerek. Birqatar iri joba qazirdiń ózinde elektr qýatyn qajet etip otyr», — dedi Oljas Bektenov.
Mańyzdy jobalar qatarynda Semeı, Óskemen jáne Kókshetaý qalalarynda zamanaýı kómir stansıalaryn iske qosý, Ekibastuz qalasyndaǵy zamanaýı GRES-3 stansasynyń qurylysy atap ótildi.
Keńes sońynda birqatar tapsyrma berildi. Bıyl KEGOC Batys aımaqtyń elektr jelilerin BEJ-ben biriktirý boıynsha qurylys-montajdaý jumystaryn bastaýy qajet, jumys 2027 jyly aıaqtalýy tıis. Atalǵan joba tutynýshylardy elektrmen jabdyqtaý senimdiligin arttyrady. Premer-mınıstr kómir hımıasy salasyn damytýǵa basa nazar aýdaryp, joǵary óńdelgen ónimder óndirý úshin kómirdi qaıta óńdeýdiń ınovasıalyq tehnologıalaryn belsendi paıdalanýdy tapsyrdy.
