Oljas Bektenov sý tasqynynyń ekinshi tolqyny qarsańynda Atyraý turǵyn alaptaryn tasqynnan qorǵaý jumystaryn tekserdi, - dep habarlaidy Dalanews.kz.
Oljas Bektenov oblys ortalyǵyndaǵy turǵyn úi alaptary bekinisterin tekserý barysynda Atyraý qalasynyń sý tasqynynyń boljamdy ekinshi tolqynyna daiyndyq jumystarymen tanysty. Batys óńirde Resei Federatsiiasynyń Iriklin sý qoimasynan sýdyń kelýine bailanysty, sondai-aq Jaiyq ózenine quiylar saǵadaǵy iri tasqyn men sý deńgeiiniń kóterilýi saldarynan jaǵdai kúrdeli kúiinde qalyp otyr.
Buryn habarlanǵandai, Batys Qazaqstan oblysyndaǵy iri sý tasqynynan keiin aǵyn sý ózen arnasymen Atyraý oblysyna qarai jyljyp, Kaspii teńizine quiady. Sońǵy táýlikte BQO tarapynan keletin sýdyń áserinen Atyraý qalasynda sý deńgeiiniń 6 sm-ge kóterilýi tirkeldi (sý tasqyny bastalǵannan beri jalpy kóterilýi 227 sm-di qurady).
Turǵyn úi alaptaryn nyǵaitý, sondai-aq Jaiyqtyń ótkizý qabiletin arttyrý úshin ózen túbin tereńdetý jumystarynyń qarqyny tekserildi. Tiisti kúshterdiń kólemdi sýdyń kelýine daiyndyq deńgeiin qarap kórdi.
Úkimet basshysy Oljas Bektenov Atyraý oblysyna sý tasqyny jaǵdaiy turaqtanǵan óńirlerden áskeri qyzmetshiler men tehnikany jedel jetkizip, kúshterdi arttyrýdy tapsyrdy.
Búgingi tańda sý tasqynynyń aldyn alý sharalarynyń 92%-y oryndaldy. Jumysty tiimdi júrgizý úshin qala 111 sektorǵa bólingen. Uzyndyǵy 482 km qorǵanys bógetteri salyndy, aiaqtalǵan ýchaskeler tehnikalyq qadaǵalaý arqyly tekserildi. Jumystarǵa TJM, IIM, Qorǵanys ministrligi, Ulttyq ulannyń 6 myńǵa jýyq áskeri qyzmetshisi, ákimdik qyzmetkerleri, 2 myńǵa jýyq tehnika jumyldyrylǵan. Eriktiler tarapynan belsendi kómek kórsetilýde. Ótken senbide jaǵalaýdy nyǵaitý senbiligi aiasynda qalany qorǵaý jumystaryna 9 myńǵa jýyq erikti qatysty.
Sonymen qatar Jaiyq ózeninen Kaspii teńizine sý ótkizý qabiletin arttyrý úshin ózen túbin tereńdetý jumystary júrgizilýde. Sý joldaryn tazartý, tereńdetý jáne keńeitý maqsatynda arnaiy tehnikalyq flottyq kemeler, gidravlikalyq ekskavatorlar qoldanylýda.
Sonymen qatar sýarý-sýlandyrý júielerinde sý tasqynyna qarsy jumystar júrgizilýde. Atyraý oblysynda 15 kanaldyń 14-i Jaiyq ózeni boiynda ornalasqan. Tórt júiede (Sokolok, Naryn, Chernaia rechka, Baqsai) tasqyn sýdyń ózdigimen aǵýyna múmkindik bar. Osyǵan bailanysty sýdy burý úshin jer bederin paidalaný maqsatynda arnalar tazartylyp, kanaldyń jiegi buzylady. Mysaly, NCOC kompaniiasy qoldanystaǵy qurylystardy bólshektei otyryp, uzyndyǵy 24 km bolatyn «Sokolok» qosymsha ainalma arnasyn salý úshin jerdi qazý jumystaryn júrgizýde. Jalpy alǵanda, atalǵan sý burý arnalary tasqyn sýdy 139,9 m3/sek aǵyzý múmkindigine ie. Barlyq negizgi sý qabyldaǵyshtarda sorǵy stansalarynyń qyzmetkerleri táýlik boiy kezekshilik atqarýda.
Qaýipti aimaqqa Jarsýat jáne Qurylys eldi mekenderi kiredi, bul aýmaqta 10,5 km bóget ornalasqan. Qazirgi ýaqytta bul aýmaqta arnaiy tehnikalar arqyly bógetter turǵyzylǵan. Sondai-aq sý basý qaýpi bar Inderbor, Eltai, Esbol, Kóktoǵai, Bódene, Órlik jáne Yntymaq aýyldarynda bógetter kóterilip jatyr. Jaǵalaýdy nyǵaitý jumystary Inder, Mahambet, Isatai jáne Qurmanǵazy aýdandarynda júrgizilýde.
Sonymen qatar sý tasqynynan zardap shekken Jylyoi aýdanynda TJ zardaptaryn joiý jumystary júrgizilýde. Elektr jáne gazben jabdyqtaýdy qalpyna keltirý jalǵasyp jatyr. 201 úide gaz berý qalpyna keltirildi, 41 úide dezinfektsiialyq jumystar aiaqtaldy. Zardap shekken turǵyndarǵa baspanany ýaqytsha jalǵa alý úshin jáne basqa maqsattarǵa 100 AEK mólsherinde qarjylyq kómek kórsetiledi, 3 271 otbasy tólem aldy. Zalaldy baǵalaý jáne óteý jónindegi komissiia jumysyn jalǵastyrýda.
