Bota Býrhanova 2024 jyldyń jazynda bazardan alǵan qaqtalǵan balyqty jep, densaýlyǵynan aiyrylǵan. Jas kelinshek jýrnalist Janar Baisemizovaǵa bergen suhbatynda taǵdyryn kúrt ózgertken kún jaily aityp berdi,- dep habarlaidy Dalanews.kz
Bota Býrhanova balyqty bazardyń aldynan alǵanyn aitty.
"3 tamyz kúni balalarymmen bazarǵa barǵanmyn. Qaqtalǵan balyq kórip, jegim keldi. Baǵasy 3 myń teńge dedi. Úige kelgen soń balalaryma bermei, tek ózim jedim. Erteńine dene qyzýym kóterilip, qusa bastadym. Biraq asa mán bermedim", – deidi Bota.
Alaida kelesi kúni jaǵdaiy kúrt nasharlap, aiaq-qoldary jansyzdana bastaǵan. Kelinshek shuǵyl túrde aýrýhanaǵa jetkizilip, birden jansaqtaý bólimine túsedi.
"Aýrýhanada kózime elester kóp kórindi. Dárigerler meni óledi dep oilapty. Týystaryma da solai aitqan. Aiaq-qolym qap-qara bolyp kógerip ketken. Qoldaǵy tamyr tabylmai, moinyma ine salyp, plazma men narkoz jiberdi. Sol sátten bastap mi qyzmeti de álsiregen", – dep eske alady Bota.
Onyń aitýynsha, ómirmen kúresinde anasynyń sheksiz meiirimi men senimi úlken ról atqarǵan.
"Anam Egipette demalysta júrgen. Men aýrýhanaǵa túskennen keiin, úsh kúnnen soń ushyp keldi. Dárigerler «qyzyńyzdan úmit joq» degende, anam jylap, janymdy saqtap qalýǵa baryn saldy. Egipetten ala kelgen zámzám sýymen meni jýyndyryp, úzdiksiz duǵa oqydy. Sodan keiin ǵana jaǵdaiym birtindep jaqsara bastady", – deidi ol.
Qazaqstandaǵy emdeý nátijesiz bolǵan soń, týystary Botany shuǵyl túrde Túrkiiaǵa aparady. Onda dárigerler ómirin saqtap qalý úshin aýyr sheshim qabyldaidy – aiaq-qoldaryn kesýge májbúr bolady.
"Alaqanymdy aman alyp qalý úshin ishimnen teri kesip alyp, tigip berdi. Aiaqtaryma 11 saǵatqa sozylǵan ota jasaldy. Qatty qaraiyp ketkendikten, ampýtatsiia jasaýǵa týra kelgen", – deidi ol.
