Astana qalasy ákimdigi Tilderdi damytý jáne arhiv isi basqarmasynyń qoldaýymen, «Rýhaniiat» kommýnaldyq memlekettik mekemesiniń uiymdastyrýmen elordada «TIL – TAǴYLYM» intellektýaldy saiysy ótti.
Saiysta «Báiterek» holdingi jáne onyń enshiles uiymdarynyń mamandarynan quralǵan 8 komanda synǵa túsip, baq synady. Olardyń qatarynda: «Báiterek» ulttyq basqarýshy holdingi» AQ, «Qazaqstannyń Damý Banki» AQ, «Otbasy Bank» AQ, «Damý» kásipkerlikti damytý qory» AQ, «Qazaqstan Turǵyn úi Kompaniiasy» AQ, «Qazaqstan Investment Corporation» AQ, «Agrarlyq nesie korporatsiiasy» AQ jáne «Qazaqstannyń eksporttyq-kredittik agenttigi» AQ qyzmetkerler quramalary qatysty.
«Til – taǵylym» intellektýaldy saiysynyń maqsaty – memlekettik tildi, el tarihyn, salt-dástúrimizdi, ǵylym men ónerdi jáne ádebi muralardy nasihattaý. Ujymmen jumys jasaý daǵdylaryn arttyrýǵa múmkindik beretin, sondai-aq, mamandardyń intelektýaldyq oi-órisin damytatyn, ziiatkerlik ortanyń qalyptasýyna zor úles qosatyn shara joǵary deńgeide ótti.
Saiys sharty boiynsha qatysýshylardyń jas ereksheligi men laýazymyna shekteý qoiylǵan joq.
Intellektýaldy saiys 5 kezeńdi qamtydy:
I. «TÓRTEÝ TÚGEL BOLSA» KIRISPE TÝRY
II. «SÓZJUMBAQ» QISYN TÝRY
III. «QARA, TYŃDA, OILAN» MEDIA TÝRY
IV. «BAILANYS» TAQYRYPTYQ TÝRY
- «AQTYQ MÁRE» SOŃǴY TÝRY
Ár kezeńde qatysýshy komandalar memlekettik til, tarih, salt-dástúr, Alash arystary, ádebiet jáne mádeniet syndy taqyryptar tóńiregindegi logikaǵa, media formattaǵy: aýdio, video materialdarǵa negizdelgen suraqtarǵa jaýap berdi. Komanda nátijeleri avtomatty túrde eseptelip, qorytyndysy shyǵaryldy.
Qyzý tartystyń nátijesinde «Otbasy Bank» AQ-nyń qurama komandasy jeńimpaz atansa, «Damý» kásipkerlikti damytý qory» AQ mamandarynan quralǵan komanda – 2 oryndy, al «Qazaqstan Turǵyn úi Kompaniiasy» AQ-nyń qyzmetkerleri – 3 oryndy ielendi. Intellektýaldy saiystyń jeńimpazdary men barlyq qatysýshylary «Rýhaniiat» kommýnaldyq memlekettik mekemesiniń atynan alǵys hattarmen jáne baǵaly syilyqtarmen marapattaldy.
