Áielin óltirdi dep aiyptalǵan eks-ministr Qýandyq Bishimbaevqa qatysty iste ekinshi aiyptalýshy Baqytjan Baijanovqa sot úkimi shyqty, - dep habarlaidy Dalanews.kz.
Qýandyq Bishimbaevtyń týysy Baqytjan Baijanov sot úkimimen 4 jylǵa bas bostandyǵynan aiyryldy. Úkimdi sýdia Aijan Qulbaeva jariialady.
Baqytjan Baijanov Qýandyq Bishimbaev jasaǵan asa aýyr qylmysty ýádesiz jasyrý boiynsha kináli dep tanyldy (Qylmystyq kodekstiń 432-baby).
Sottalýshylardyń kinási jábirlenýshiniń, kýálardyń aiǵaqtarymen, aýdio-beinematerialdarmen, saraptamalyq qorytyndylarmen jáne qylmystyq istiń basqa materialdarymen dáleldendi.
"Prokýror Bishimbaevty 24 jylǵa, Baijanovty 4 jylǵa bas bostandyǵynan aiyrýdy surady. Sot otyrysynda sottalýshylar óz kinálaryn moiyndamady. Sot Qylmystyq kodekstiń 53-babyna sáikes sottalýshylar Bishimbaev pen Baijanov úshin kámeletke tolmaǵan balalary bolýyn jeńildetetin mán-jailar dep tanydy", - dep jazylǵan sot málimetinde.
Aiyptaý qorytyndysyna sáikes Baijanovtyń qylmystyq jaýapkershiligi men jazasyn aýyrlatatyn mán-jailar anyqtalmaǵan.
Jaza mólsheri týraly máseleni sýdia men alqabiler Qylmystyq is júrgizý kodeksiniń 656-babyna sáikes ashyq daýys berý arqyly kópshilik daýysty eskere otyryp sheshken.
Alǵashynda Baqytjan Baijanov Qylmystyq kodekstiń eki baby boiynsha qylmys jasady dep aiyptaldy: 432-bap "aýa aýyr qylmysty jasyryp qalý" jáne 434-bap "asa aýyr qylmysty habarlamaý".
Aita keteiik, Astana qalasynyń mamandandyrylǵan aýdanaralyq sotynda Qýandyq Bishimbaevqa qatysty qylmystyq is boiynsha birneshe sot otyrysy ótti. Ony dúiim jurt Joǵarǵy sottyń YouTube kanalynan onlain tamashalady.
Azamattyq nekedegi áieli Saltanat Núkenovany óltirdi degen aiyppen sotty bolǵan eks-ministr Qýandyq Bishimbaevty advokat Leila Ramazanova, Nazken Qusaiynova, Erlan Ǵazymjanovtar qorǵady.
Al marqum Saltanat Núkenovanyń aǵasy Aitbek Amangeldi men onyń otbasynyń advokattary Janna Orazbahova men Áliia Omarova, Igor Vranchev boldy.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
