ايەلىن ءولتىردى دەپ ايىپتالعان ەكس-مينيستر قۋاندىق بيشىمبايەۆقا قاتىستى ىستە ەكىنشى ايىپتالۋشى باقىتجان بايجانوۆقا سوت ۇكىمى شىقتى، - دەپ حابارلايدى Dalanews.kz.
قۋاندىق بيشىمبايەۆتىڭ تۋىسى باقىتجان بايجانوۆ سوت ۇكىمىمەن 4 جىلعا باس بوستاندىعىنان ايىرىلدى. ۇكىمدى سۋديا ايجان قۇلبايەۆا جاريالادى.
باقىتجان بايجانوۆ قۋاندىق بيشىمبايەۆ جاساعان اسا اۋىر قىلمىستى ۋادەسىز جاسىرۋ بويىنشا كىنالى دەپ تانىلدى (قىلمىستىق كودەكستىڭ 432-بابى).
سوتتالۋشىلاردىڭ كىناسى جابىرلەنۋشىنىڭ، كۋالاردىڭ ايعاقتارىمەن، اۋديو-بەينەماتەريالدارمەن، ساراپتامالىق قورىتىندىلارمەن جانە قىلمىستىق ءىستىڭ باسقا ماتەريالدارىمەن دالەلدەندى.
"پروكۋرور بيشىمبايەۆتى 24 جىلعا، بايجانوۆتى 4 جىلعا باس بوستاندىعىنان ايىرۋدى سۇرادى. سوت وتىرىسىندا سوتتالۋشىلار ءوز كىنالارىن مويىندامادى. سوت قىلمىستىق كودەكستىڭ 53-بابىنا سايكەس سوتتالۋشىلار بيشىمبايەۆ پەن بايجانوۆ ءۇشىن كامەلەتكە تولماعان بالالارى بولۋىن جەڭىلدەتەتىن ءمان-جايلار دەپ تانىدى"، - دەپ جازىلعان سوت مالىمەتىندە.
ايىپتاۋ قورىتىندىسىنا سايكەس بايجانوۆتىڭ قىلمىستىق جاۋاپكەرشىلىگى مەن جازاسىن اۋىرلاتاتىن ءمان-جايلار انىقتالماعان.
جازا مولشەرى تۋرالى ماسەلەنى سۋديا مەن القابيلەر قىلمىستىق ءىس جۇرگىزۋ كودەكسىنىڭ 656-بابىنا سايكەس اشىق داۋىس بەرۋ ارقىلى كوپشىلىك داۋىستى ەسكەرە وتىرىپ شەشكەن.
العاشىندا باقىتجان بايجانوۆ قىلمىستىق كودەكستىڭ ەكى بابى بويىنشا قىلمىس جاسادى دەپ ايىپتالدى: 432-باپ "اۋا اۋىر قىلمىستى جاسىرىپ قالۋ" جانە 434-باپ "اسا اۋىر قىلمىستى حابارلاماۋ".
ايتا كەتەيىك، استانا قالاسىنىڭ مامانداندىرىلعان اۋدانارالىق سوتىندا قۋاندىق بيشىمبايەۆقا قاتىستى قىلمىستىق ءىس بويىنشا بىرنەشە سوت وتىرىسى ءوتتى. ونى ءدۇيىم جۇرت جوعارعى سوتتىڭ YouTube كانالىنان ونلاين تاماشالادى.
ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن سوتتى بولعان ەكس-مينيستر قۋاندىق بيشىمبايەۆتى ادۆوكات لەيلا رامازانوۆا، نازكەن قۇسايىنوۆا، ەرلان عازىمجانوۆتار قورعادى.
ال مارقۇم سالتانات نۇكەنوۆانىڭ اعاسى ايتبەك امانگەلدى مەن ونىڭ وتباسىنىڭ ادۆوكاتتارى جاننا ورازباحوۆا مەن ءاليا وماروۆا، يگور ۆرانچيەۆ بولدى.
27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.
بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
