Áielin óltirdi dep aiyptalyp otyrǵan burynǵy ulttyq ekonomika ministri Qýandyq Bishimbaevqa qatysty sot jaryssózi búgin de jalǵasty. Búgin sóz kezegi osy is boiynsha ekinshi aiyptalýshy Baqytjan Baijanovqa berildi, - dep habarlaidy Dalanews.kz.
Baijanov bul joly qazaq tilinen orys tiline aýdaratyn aýdarmashyny qajet etpedi, ózi bastan aiaq qaǵazdan orys tilinde oqyp berdi. Keiin ol taǵylǵan aiyptarmen ne úshin kelispeitinin túsindirdi. Sózine sensek, Saltanattyń denesin jasyrý oiynda da bolmaǵan.
"Bárin advokattarym aityp ketti. Tek bir-eki nárse qosa ketsem deimin. Meni Bishimbaevpen birge Saltanattyń denesin jasyrmaq boldy dep aiyptap otyr. Rasynda da, aiyptaýshy tarap pen jábirlenýshi tarap aitqandai, Bishimbaevpen birigip, Saltanattyń denesin jasyrýdy josparlasam, nege solai istemedim?! Olardyń logikasyna súiensek, kúni boiy deneni jasyrýǵa daiyndalǵandai bolamyn. Onda nege yńǵaily ýaqyt týǵanda, aldymyz tún bolǵanda, onyń ústine meiramhanada bóten eshkim bolmaǵan kezde bul ideiadan bas tarttym? Men muny áý bastan josparlamaǵandyqtan istemedim. Men tipti Saltanat qaitys bolǵanyn bilmedim", - dedi ol.
Sondai-aq, Baijanov ózin Bishimbaevpen birge qylmys izderin jasyrýǵa qatysty aiyptap otyrǵanyn, degenmen qylmys orny tolyq tekserilmegenin aitty.
"Nege bári nashatyr men kóilekti men laqtyrǵanyma senimdi? Bul tek boljam ǵoi. Ony búkil jerden izdegen de joq qoi. 4 ret oqiǵa orny tekserildi, bir ret Bishimbaevtyń kóligi, al úsh ret tek bir vip-kabina tekserildi. Meiramhanadaǵy basqa oryndar tekserilmegen. Múmkin quty men kóilek áli de sonda shyǵar?!" - dedi ol.
Baijanov tipti osy aiyptardan keiin "shyndyq detektorynan ótýge daiyn ekenin, óziniń aldaǵy taǵdyry sýdia men alqabilerdiń qolynda ekenin" aityp, sózin kenet úzip tastady.
Keiin sóz kezegi prokýror Aijan Aimaǵanovaǵa berilgende, ol Baijanov oqiǵa bolǵan kúngi árekettiń bárine sanaly túrde barǵanyn málimdedi.
"Baijanov bárin sanaly túrde jasady, ol ne bolyp jatqanyn anyq túsindi", - dedi prokýror.
Aita keteiik, Astana qalasynyń mamandandyrylǵan aýdanaralyq sotynda Qýandyq Bishimbaevqa qatysty qylmystyq is boiynsha birneshe sot otyrysy ótti. Ony dúiim jurt Joǵarǵy sottyń YouTube arnasynan onlain qarady.
Azamattyq nekedegi áieli Saltanat Núkenovany óltirdi degen aiyppen sottalyp jatqan eks-ministr Qýandyq Bishimbaevty advokat Leila Ramazanova, Nazken Qusaiynova, Erlan Ǵazymjanovtar qorǵap jatyr.
Al marqum Saltanat Núkenovanyń aǵasy Aitbek Amangeldi men onyń otbasynyń advokattary – Janna Orazbahova men Áliia Omarova.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Bishimbaevqa eki bap boiynsha aiyp taǵyldy:
- asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý);
- qinaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
