ايەلىن ءولتىردى دەپ ايىپتالىپ وتىرعان بۇرىنعى ۇلتتىق ەكونوميكا ءمينيسترى قۋاندىق بيشىمبايەۆقا قاتىستى سوت ءجارىسسوزى بۇگىن دە جالعاستى. بۇگىن ءسوز كەزەگى وسى ءىس بويىنشا ەكىنشى ايىپتالۋشى باقىتجان بايجانوۆقا بەرىلدى، - دەپ حابارلايدى Dalanews.kz.
بايجانوۆ بۇل جولى قازاق تىلىنەن ورىس تىلىنە اۋداراتىن اۋدارماشىنى قاجەت ەتپەدى، ءوزى باستان اياق قاعازدان ورىس تىلىندە وقىپ بەردى. كەيىن ول تاعىلعان ايىپتارمەن نە ءۇشىن كەلىسپەيتىنىن ءتۇسىندىردى. سوزىنە سەنسەك، سالتاناتتىڭ دەنەسىن جاسىرۋ ويىندا دا بولماعان.
"ءبارىن ادۆوكاتتارىم ايتىپ كەتتى. تەك بىر-ەكى نارسە قوسا كەتسەم دەيمىن. مەنى بيشىمبايەۆپەن بىرگە سالتاناتتىڭ دەنەسىن جاسىرماق بولدى دەپ ايىپتاپ وتىر. راسىندا دا، ايىپتاۋشى تاراپ پەن جابىرلەنۋشى تاراپ ايتقانداي، بيشىمبايەۆپەن بىرىگىپ، سالتاناتتىڭ دەنەسىن جاسىرۋدى جوسپارلاسام، نەگە سولاي ىستەمەدىم؟! ولاردىڭ لوگيكاسىنا سۇيەنسەك، كۇنى بويى دەنەنى جاسىرۋعا دايىندالعانداي بولامىن. وندا نەگە ىڭعايلى ۋاقىت تۋعاندا، الدىمىز ءتۇن بولعاندا، ونىڭ ۇستىنە مەيرامحانادا بوتەن ەشكىم بولماعان كەزدە بۇل يدەيادان باس تارتتىم؟ مەن مۇنى ءاۋ باستان جوسپارلاماعاندىقتان ىستەمەدىم. مەن ءتىپتى سالتانات قايتىس بولعانىن بىلمەدىم"، - دەدى ول.
سونداي-اق، بايجانوۆ ءوزىن بيشىمبايەۆپەن بىرگە قىلمىس ىزدەرىن جاسىرۋعا قاتىستى ايىپتاپ وتىرعانىن، دەگەنمەن قىلمىس ورنى تولىق تەكسەرىلمەگەنىن ايتتى.
"نەگە ءبارى ناشاتىر مەن كويلەكتى مەن لاقتىرعانىما سەنىمدى؟ بۇل تەك بولجام عوي. ونى بۇكىل جەردەن ىزدەگەن دە جوق قوي. 4 رەت وقيعا ورنى تەكسەرىلدى، ءبىر رەت بيشىمبايەۆتىڭ كولىگى، ال ءۇش رەت تەك ءبىر ۆيپ-كابينا تەكسەرىلدى. مەيرامحاناداعى باسقا ورىندار تەكسەرىلمەگەن. مۇمكىن قۇتى مەن كويلەك ءالى دە سوندا شىعار؟!" - دەدى ول.
بايجانوۆ ءتىپتى وسى ايىپتاردان كەيىن "شىندىق دەتەكتورىنان وتۋگە دايىن ەكەنىن، ءوزىنىڭ الداعى تاعدىرى سۋديا مەن القابيلەردىڭ قولىندا ەكەنىن" ايتىپ، ءسوزىن كەنەت ءۇزىپ تاستادى.
كەيىن ءسوز كەزەگى پروكۋرور ايجان ايماعانوۆاعا بەرىلگەندە، ول بايجانوۆ وقيعا بولعان كۇنگى ارەكەتتىڭ بارىنە سانالى تۇردە بارعانىن مالىمدەدى.
"بايجانوۆ ءبارىن سانالى تۇردە جاسادى، ول نە بولىپ جاتقانىن انىق ءتۇسىندى"، - دەدى پروكۋرور.
ايتا كەتەيىك، استانا قالاسىنىڭ مامانداندىرىلعان اۋدانارالىق سوتىندا قۋاندىق بيشىمبايەۆقا قاتىستى قىلمىستىق ءىس بويىنشا بىرنەشە سوت وتىرىسى ءوتتى. ونى ءدۇيىم جۇرت جوعارعى سوتتىڭ YouTube ارناسىنان ونلاين قارادى.
ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن سوتتالىپ جاتقان ەكس-مينيستر قۋاندىق بيشىمبايەۆتى ادۆوكات لەيلا رامازانوۆا، نازكەن قۇسايىنوۆا، ەرلان عازىمجانوۆتار قورعاپ جاتىر.
ال مارقۇم سالتانات نۇكەنوۆانىڭ اعاسى ايتبەك امانگەلدى مەن ونىڭ وتباسىنىڭ ادۆوكاتتارى – جاننا ورازباحوۆا مەن ءاليا وماروۆا.
27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.
سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
بيشىمبايەۆقا ەكى باپ بويىنشا ايىپ تاعىلدى:
- اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ)؛
- قيناۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).
