Áielin óltirdi dep aiyptalyp otyrǵan eks-ministr Qýandyq Bishimbaevqa qatysty sot otyrysynda ekinshi aiyptalýshy Baqytjan Baijanov qylmysty jasyryp qaldy degenmen kelispeitinin málimdedi, - dep habarlaidy Dalanews.kz.
Sot otyrysy bastalǵannan keiin Qýandyq Bishimbaevtyń advokaty Ǵazymjanov zaldan "#ZaSaltanat. Pojiznennoe" dep jazylǵan kiim kigen adamdardy shyǵaryp jiberýdi surady. Alaida sýdia qorǵaýshy taraptyń bul ótinishin qanaǵattandyrmady.
Sonymen qatar, Baijanov jasyryp qaldy degen aiyppen kelispeitinin málimdedi.
"Qorǵaýshymdy qoldaimyn. Jasyryp qaldy degenmen kelispeimin. Qylmysty jasyryp qalǵan joqpyn", - dedi ol.
Buǵan deiin aiyptaýshy tarap ekinshi sottalýshy Baqytjan Baijanovqa qatysty sot tergeýin qaita bastaýǵa ótinish jasady.
Baqytjan Baijanov Qylmystyq kodekstiń eki baby boiynsha qylmys jasady dep aiyptalyp otyr: 432-bap "aýa aýyr qylmysty jasyryp qalý" jáne 434-bap "asa aýyr qylmysty habarlamaý".
Ótken sot otyrysynda sot jaryssózi bastalar aldynda memlekettik aiyptaýshy sottalýshy Baqytjan Baijanovqa taǵylǵan aiypty naqtylaý úshin sot tergeýin qaita bastaý týraly ótinishhatty málimdedi. Sot ótinishhatty qanaǵattandyrdy.
Prokýror Baqytjan Baijanovqa qatysty Qylmystyq kodekstiń 434-babynyń (qylmys týraly habarlamaý) bóliginde aiyptaýdan bas tartty jáne oǵan qatysty qylmystyq isti Qylmystyq kodekstiń 432-baby boiynsha qaraýdy jalǵastyrýdy surady (asa aýyr qylmysty kúni buryn ýádelespei jasyryp qalý).
Sot taraptarǵa Baqytjan Baijanovqa qatysty aiyptaýdyń jańa tujyrymymen tanysýǵa ýaqyt berdi. Sot otyrysy osylaisha 2 mamyrǵa shegerilgen edi.
Aita keteiik, Astana qalasynyń mamandandyrylǵan aýdanaralyq sotynda Qýandyq Bishimbaevqa qatysty qylmystyq is boiynsha birneshe sot otyrysy ótti. Ony dúiim jurt Joǵarǵy sottyń YouTube kanalynan onlain tamashalady.
Azamattyq nekedegi áieli Saltanat Núkenovany óltirdi degen aiyppen sottalyp jatqan eks-ministr Qýandyq Bishimbaevty advokat Leila Ramazanova, Nazken Qusaiynova, Erlan Ǵazymjanovtar qorǵap jatyr.
Al marqum Saltanat Núkenovanyń aǵasy Aitbek Amangeldi men onyń otbasynyń advokattary – Janna Orazbahova men Áliia Omarova.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Bishimbaevqa eki bap boiynsha aiyp taǵyldy:
- asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý);
- qinaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
Qýandyq Bishimbaevqa qatysty 24 sáýirde ótken sot otyrysynda sot tergeýi aiaqtalǵany belgili boldy. Endigi kezek sot jaryssózinde. Sot jaryssózi 3 jáne 4 mamyrda da jalǵasady.
