ايەلىن ءولتىردى دەپ ايىپتالىپ وتىرعان ەكس-مينيستر قۋاندىق بيشىمبايەۆقا قاتىستى سوت وتىرىسىندا ەكىنشى ايىپتالۋشى باقىتجان بايجانوۆ قىلمىستى جاسىرىپ قالدى دەگەنمەن كەلىسپەيتىنىن مالىمدەدى، - دەپ حابارلايدى Dalanews.kz.
سوت وتىرىسى باستالعاننان كەيىن قۋاندىق بيشىمبايەۆتىڭ ادۆوكاتى عازىمجانوۆ زالدان "#زاسالتانات. پوجيزنەننوە" دەپ جازىلعان كيىم كيگەن ادامداردى شىعارىپ جىبەرۋدى سۇرادى. الايدا سۋديا قورعاۋشى تاراپتىڭ بۇل ءوتىنىشىن قاناعاتتاندىرمادى.
سونىمەن قاتار، بايجانوۆ جاسىرىپ قالدى دەگەن ايىپپەن كەلىسپەيتىنىن مالىمدەدى.
"قورعاۋشىمدى قولدايمىن. جاسىرىپ قالدى دەگەنمەن كەلىسپەيمىن. قىلمىستى جاسىرىپ قالعان جوقپىن"، - دەدى ول.
بۇعان دەيىن ايىپتاۋشى تاراپ ەكىنشى سوتتالۋشى باقىتجان بايجانوۆقا قاتىستى سوت تەرگەۋىن قايتا باستاۋعا ءوتىنىش جاسادى.
باقىتجان بايجانوۆ قىلمىستىق كودەكستىڭ ەكى بابى بويىنشا قىلمىس جاسادى دەپ ايىپتالىپ وتىر: 432-باپ "اۋا اۋىر قىلمىستى جاسىرىپ قالۋ" جانە 434-باپ "اسا اۋىر قىلمىستى حابارلاماۋ".
وتكەن سوت وتىرىسىندا سوت ءجارىسسوزى باستالار الدىندا مەملەكەتتىك ايىپتاۋشى سوتتالۋشى باقىتجان بايجانوۆقا تاعىلعان ايىپتى ناقتىلاۋ ءۇشىن سوت تەرگەۋىن قايتا باستاۋ تۋرالى ءوتىنىشحاتتى مالىمدەدى. سوت ءوتىنىشحاتتى قاناعاتتاندىردى.
پروكۋرور باقىتجان بايجانوۆقا قاتىستى قىلمىستىق كودەكستىڭ 434-بابىنىڭ (قىلمىس تۋرالى حابارلاماۋ) بولىگىندە ايىپتاۋدان باس تارتتى جانە وعان قاتىستى قىلمىستىق ءىستى قىلمىستىق كودەكستىڭ 432-بابى بويىنشا قاراۋدى جالعاستىرۋدى سۇرادى (اسا اۋىر قىلمىستى كۇنى بۇرىن ۋادەلەسپەي جاسىرىپ قالۋ).
سوت تاراپتارعا باقىتجان بايجانوۆقا قاتىستى ايىپتاۋدىڭ جاڭا تۇجىرىمىمەن تانىسۋعا ۋاقىت بەردى. سوت وتىرىسى وسىلايشا 2 مامىرعا شەگەرىلگەن ەدى.
ايتا كەتەيىك، استانا قالاسىنىڭ مامانداندىرىلعان اۋدانارالىق سوتىندا قۋاندىق بيشىمبايەۆقا قاتىستى قىلمىستىق ءىس بويىنشا بىرنەشە سوت وتىرىسى ءوتتى. ونى ءدۇيىم جۇرت جوعارعى سوتتىڭ YouTube كانالىنان ونلاين تاماشالادى.
ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن سوتتالىپ جاتقان ەكس-مينيستر قۋاندىق بيشىمبايەۆتى ادۆوكات لەيلا رامازانوۆا، نازكەن قۇسايىنوۆا، ەرلان عازىمجانوۆتار قورعاپ جاتىر.
ال مارقۇم سالتانات نۇكەنوۆانىڭ اعاسى ايتبەك امانگەلدى مەن ونىڭ وتباسىنىڭ ادۆوكاتتارى – جاننا ورازباحوۆا مەن ءاليا وماروۆا.
27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.
سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
بيشىمبايەۆقا ەكى باپ بويىنشا ايىپ تاعىلدى:
- اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ)؛
- قيناۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).
قۋاندىق بيشىمبايەۆقا قاتىستى 24 ساۋىردە وتكەن سوت وتىرىسىندا سوت تەرگەۋى اياقتالعانى بەلگىلى بولدى. ەندىگى كەزەك سوت جارىسسوزىندە. سوت ءجارىسسوزى 3 جانە 4 مامىردا دا جالعاسادى.
