Azamattyq belsendi Sanavar Zakirova bastaǵan sot sheshimine narazy bir top adam 16 naýryzda Eýroodaqtyń Qazaqstandaǵy ókildigine aryz tapsyryp, Qazaqstannyń birqatar laýazymdy tulǵalaryna jeke sanktsiia salýdy surady.
Olar aryzda kórsetilgen sheneýnikter "azamattardyń konstitýtsiialyq quqyǵyn, azamattyq jáne múliktik quqyqtaryn dóreki, negizsiz túrde buzdy" dep sanaidy.
Jinalǵandardyń atynan elshilikterdiń ǵimaratyna qabyldaýǵa Sanavar Zakirova kirdi. Ol shyqqannan keiin 13 adamnyń atynan aryz tapsyrǵanyn aitty.
Túrli ister boiynsha shyqqan "ádiletsiz" sot sheshimderine narazy top buǵan deiin aqparat quraldaryna "sot jáne quqyq qorǵaý organdarynan kórgen quqailaryn" baiandap, ádildikke qol jetkizgisi keletinin aitqan. Olardyń biri zańdy múlkin qaitara almai júrse, endi biri "jumystan zańsyz qýyldym" deidi. Qazaqstannyń bas prokýratýrasyna, joǵarǵy sotqa, prezident ákimshiligine talai baryp "ádildikke jete almadyq" degenderdiń endigi úmiti - Eýroparlament depýtattary men olardyń biylǵy aqpanda qabyldaǵan "Qazaqstandaǵy adam quqyǵy ahýaly jaily qarary".
Aryz tapsyrýǵa kelgenderdiń biri – Almaty qalalyq apelliatsiialyq sot alqasynyń burynǵy sýdiasy Kúlpash Ótemisova. Ol ózin "Qazaqstandaǵy óziniń ádil sheshiminiń qurbany bolǵan alǵashqy jáne jalǵyz sýdiamyn" dep tanystyrdy.
– Men apelliatsiialyq sheshim shyǵararda iri óndiris oshaǵyn tartyp alǵysy kelgen biliktiń joǵary isteblishmentiniń múddesin kózdegen óz basshylarymnyń zańsyz nusqaýyna baǵynbadym. Sol úshin 2013 jyly joǵarǵy sottyń rezervinde turǵanymda jazyqsyz kúiip kettim. Sondyqtan ádildik izdep sot júiesinde istegen jáne istep jatqan 18 adamnyń aty-jónin jazdym, - dedi ol.
Ol aryzda kórsetken adamdardyń arasynda Almaty qalalyq sotynyń burynǵy tóraǵasy, qazirgi joǵarǵy sottyń azamattyq ister jónindegi alqasynyń tóraǵasy, joǵary sottyń burynǵy tóraǵasy, qazirgi konstitýtsiialyq keńestiń tóraǵasy, burynǵy bas prokýror da bar ekenin jetkizdi.
Sanavar Zakirova óziniń saiasi ispen bir jylǵa bas bostandyǵynan aiyrylǵanyn, saiasi ashyq básekelestik joqtyǵyn, partiia qurǵysy kelgeni úshin qýdalanǵanyn aityp, "Nur Otan" partiiasynyń jetkshisi men laýazymdy múshelerine sanktsiia surap aryzdanǵanyn málimdedi.
– "Nur Otan" partiiasynyń tóraǵasy Nursultan Nazarbaev pen onyń orynbasary Baýyrjan Baibekti atadym. Onyń ústine joǵarǵy sot tóraǵasy Jaqyp Asanov, ishki ister ministri Erjan Turǵymbaev ta – "Nur Otan" partiiasy múshesi. Olar partiia múddesin kózdep, maǵan qatysty zańsyz sheshim qabyldady. Osy adamdar Qazaqstandaǵy azamattar quqyǵyn buzady, sondyqtan men "Nur Otan" partiiasynyń basshylyǵy men onyń birqatar múshelerine sanktsiia salýdy suradym, - deidi Sanavar Zakirova.
52 jastaǵy belsendi Sanavar Zakirova túrmeden 22 qańtarda bostandyqqa shyqqan. Ol Almaty qalasy Medeý aýdandyq sotynyń 2020 jylǵy 15 shildedegi úkimimen Qylmystyq kodekstiń "densaýlyqqa qasaqana ziian keltirý" baby boiynsha bir jylǵa bas bostandyǵynan aiyrylǵan edi. Biraq Sanavar Zakirovanyń ózi aiybyn moiyndamai, "istiń saiasi astary bar" dep sanaidy. Qazaqstandyq quqyq qorǵaýshylar ony "saiasi tutqyndar" tizimine engizgen. Ol ózderi ádiletsiz dep sanaityn sot sheshimderiniń kúshin joiýdy talap etip, narazylyq aktsiialaryna shyǵyp júrgen toptyń jetekshisi. Zakirova Facebook-te "Nur Otan" partiiasyn jii synaidy.
11 aqpanda Eýropa parlamenti basym kópshilik daýyspen "Qazaqstandaǵy adam quqyqtary jónindegi" qarar qabyldady. Qararda eldegi azamattyq qoǵam aiasynyń tarylýyn, adam quqyqtarynyń buzylýy, sailaýdaǵy ádiletsizdik, túrmedegi azaptaý, belsendilerdi qýdalaý siiaqty adam quqyǵyn buzý faktileri aitylǵan. Bul qarardy jergilikti sarapshylar men quqyq qorǵaýshylar "keiingi jyldardaǵy eń obektivti qujat" dep atasa, bilik "teris ustanymdaǵy saiasatkerler usynǵan" degen.
Foto: tengrinews.kz
