ولار ارىزدا كورسەتىلگەن شەنەۋنىكتەر "ازاماتتاردىڭ كونستيتۋسيالىق قۇقىعىن، ازاماتتىق جانە مۇلىكتىك قۇقىقتارىن دورەكى، نەگىزسىز تۇردە بۇزدى" دەپ سانايدى.
جينالعانداردىڭ اتىنان ەلشىلىكتەردىڭ عيماراتىنا قابىلداۋعا ساناۆار زاكيروۆا كىردى. ول شىققاننان كەيىن 13 ادامنىڭ اتىنان ارىز تاپسىرعانىن ايتتى.
ءتۇرلى ىستەر بويىنشا شىققان "ادىلەتسىز" سوت شەشىمدەرىنە نارازى توپ بۇعان دەيىن اقپارات قۇرالدارىنا "سوت جانە قۇقىق قورعاۋ ورگاندارىنان كورگەن قۇقايلارىن" بايانداپ، ادىلدىككە قول جەتكىزگىسى كەلەتىنىن ايتقان. ولاردىڭ ءبىرى زاڭدى مۇلكىن قايتارا الماي جۇرسە، ەندى ءبىرى "جۇمىستان زاڭسىز قۋىلدىم" دەيدى. قازاقستاننىڭ باس پروكۋراتۋراسىنا، جوعارعى سوتقا، پرەزيدەنت اكىمشىلىگىنە تالاي بارىپ "ادىلدىككە جەتە المادىق" دەگەندەردىڭ ەندىگى ءۇمىتى - ەۋروپارلامەنت دەپۋتاتتارى مەن ولاردىڭ بيىلعى اقپاندا قابىلداعان "قازاقستانداعى ادام قۇقىعى احۋالى جايلى قارارى".
ارىز تاپسىرۋعا كەلگەندەردىڭ ءبىرى – الماتى قالالىق اپەللياسيالىق سوت القاسىنىڭ بۇرىنعى سۋدياسى كۇلپاش وتەمىسوۆا. ول ءوزىن "قازاقستانداعى ءوزىنىڭ ءادىل شەشىمىنىڭ قۇربانى بولعان العاشقى جانە جالعىز سۋديامىن" دەپ تانىستىردى.
– مەن اپەللياسيالىق شەشىم شىعاراردا ءىرى ءوندىرىس وشاعىن تارتىپ العىسى كەلگەن بيلىكتىڭ جوعارى يستەبليشمەنتىنىڭ مۇددەسىن كوزدەگەن ءوز باسشىلارىمنىڭ زاڭسىز نۇسقاۋىنا باعىنبادىم. سول ءۇشىن 2013 جىلى جوعارعى سوتتىڭ رەزەرۆىندە تۇرعانىمدا جازىقسىز كۇيىپ كەتتىم. سوندىقتان ادىلدىك ىزدەپ سوت جۇيەسىندە ىستەگەن جانە ىستەپ جاتقان 18 ادامنىڭ ءاتى-جونىن جازدىم، - دەدى ول.
ول ارىزدا كورسەتكەن ادامداردىڭ اراسىندا الماتى قالالىق سوتىنىڭ بۇرىنعى ءتوراعاسى، قازىرگى جوعارعى سوتتىڭ ازاماتتىق ىستەر جونىندەگى القاسىنىڭ ءتوراعاسى، جوعارى سوتتىڭ بۇرىنعى ءتوراعاسى، قازىرگى كونستيتۋسيالىق كەڭەستىڭ ءتوراعاسى، بۇرىنعى باس پروكۋرور دا بار ەكەنىن جەتكىزدى.
ساناۆار زاكيروۆا ءوزىنىڭ ساياسي ىسپەن ءبىر جىلعا باس بوستاندىعىنان ايىرىلعانىن، ساياسي اشىق باسەكەلەستىك جوقتىعىن، پارتيا قۇرعىسى كەلگەنى ءۇشىن قۋدالانعانىن ايتىپ، "نۇر وتان" پارتياسىنىڭ جەتكشىسى مەن لاۋازىمدى مۇشەلەرىنە سانكسيا سۇراپ ارىزدانعانىن مالىمدەدى.
– "نۇر وتان" پارتياسىنىڭ ءتوراعاسى نۇرسۇلتان نازاربايەۆ پەن ونىڭ ورىنباسارى باۋىرجان بايبەكتى اتادىم. ونىڭ ۇستىنە جوعارعى سوت ءتوراعاسى جاقىپ اسانوۆ، ىشكى ىستەر ءمينيسترى ەرجان تۇرعىمبايەۆ تا – "نۇر وتان" پارتياسى مۇشەسى. ولار پارتيا مۇددەسىن كوزدەپ، ماعان قاتىستى زاڭسىز شەشىم قابىلدادى. وسى ادامدار قازاقستانداعى ازاماتتار قۇقىعىن بۇزادى، سوندىقتان مەن "نۇر وتان" پارتياسىنىڭ باسشىلىعى مەن ونىڭ ءبىرقاتار مۇشەلەرىنە سانكسيا سالۋدى سۇرادىم، - دەيدى ساناۆار زاكيروۆا.
52 جاستاعى بەلسەندى ساناۆار زاكيروۆا تۇرمەدەن 22 قاڭتاردا بوستاندىققا شىققان. ول الماتى قالاسى مەدەۋ اۋداندىق سوتىنىڭ 2020 جىلعى 15 شىلدەدەگى ۇكىمىمەن قىلمىستىق كودەكستىڭ "دەنساۋلىققا قاساقانا زيان كەلتىرۋ" بابى بويىنشا ءبىر جىلعا باس بوستاندىعىنان ايىرىلعان ەدى. ءبىراق ساناۆار زاكيروۆانىڭ ءوزى ايىبىن مويىنداماي، "ءىستىڭ ساياسي استارى بار" دەپ سانايدى. قازاقستاندىق قۇقىق قورعاۋشىلار ونى "ساياسي تۇتقىندار" تىزىمىنە ەنگىزگەن. ول وزدەرى ادىلەتسىز دەپ سانايتىن سوت شەشىمدەرىنىڭ كۇشىن جويۋدى تالاپ ەتىپ، نارازىلىق اكسيالارىنا شىعىپ جۇرگەن توپتىڭ جەتەكشىسى. زاكيروۆا Facebook-تە "نۇر وتان" پارتياسىن ءجيى سىنايدى.
11 اقپاندا ەۋروپا پارلامەنتى باسىم كوپشىلىك داۋىسپەن "قازاقستانداعى ادام قۇقىقتارى جونىندەگى" قارار قابىلدادى. قاراردا ەلدەگى ازاماتتىق قوعام اياسىنىڭ تارىلۋىن، ادام قۇقىقتارىنىڭ بۇزىلۋى، سايلاۋداعى ادىلەتسىزدىك، تۇرمەدەگى ازاپتاۋ، بەلسەندىلەردى قۋدالاۋ سياقتى ادام قۇقىعىن بۇزۋ فاكتىلەرى ايتىلعان. بۇل قاراردى جەرگىلىكتى ساراپشىلار مەن قۇقىق قورعاۋشىلار "كەيىنگى جىلدارداعى ەڭ وبەكتيۆتى قۇجات" دەپ اتاسا، بيلىك "تەرىس ۇستانىمداعى ساياساتكەرلەر ۇسىنعان" دەگەن.
فوتو: tengrinews.kz
