Aıta keteıik, osyǵan deıin birqatar BAQ-ta pedagogıka ǵylymdarynyń doktory Saırash Jıenbaevanyń "Baıan Esentaeva men Nurtas Adambaı ultqa úlgi emes" degen suhbaty jarıalanǵan bolatyn. Sol suhbatynda ǵalym UBT-ǵa Baıan Esentaeva men Nurtas Adambaıdy qosý durys emes ekenin aıtqan edi.
– Olar tipti artyq, orynsyz. Iá, olar shoý-bıznestiń jańa ókilderi, olardy kásibı jetistikte jáne ózin damytý retinde mysalǵa keltirýge bolady. Biraq jeke ómirde ekeýi de sátsizdikke uryndy, olar úlgi bolýǵa jaramaıdy. Baıan Esentaeva da, Nurtas Adambaı da otbasyny saqtaı almaı, ajyrasqan. Qazaqtarda jeke ómirin jurtqa jaıyp, odan shoý jasaý, tipti kapıtal túsirý jat, – dep málimdegen edi.
Osyǵan qatysty prodúser jaýap qatyp otyr.
– Men týraly suraqtardyń memlekettik emtıhanǵa túsý-túspeýi alańdatpaıdy. Biraq meniń kásibı jetistikterim men jeke ómirimniń baılanysy alańdatady. Meniń týra siz sıaqty ajyrasýǵa jáne turmysqa shyǵýǵa quqym bar, Saırash Jıenbaeva. Eger sizdiń jeke ómirińiz qoǵam nazarynan tys qalyp jatsa, meniń jaǵdaıymda bul múmkin emes, tanymaldyǵym úshin keshirim suraımyn, bul tanymaldylyq maǵan kásibı qyzmetim arqyly kelgen. Onda ózim serıalyn prodúserlik etken Uly Kúlásh Baıseıitovany da úlgi qylýdy qoıaıyq, ol da ajyrasyp, turmysqa shyqty ǵoı, taǵy bir uly tulǵa Bıbigúl Tólegenovany da, basqa belgili tulǵalardy da úlgi qylmaıyq endeshe. Barlyǵy da tez umytylyp, sońynan tas atýshylardyń osynshalyqty tez shyǵa keletini-aı. Sizge suraǵym bar, shákirtim Janar Duǵalova (meniń nıetim men tyrysýymnyń arqasynda) jeńimpaz atanǵanda «Túrkvıjnde» Qazaqstan týyn siz kóterdińiz be? Álde búkil el biletin Kámshat Joldybaeva men basqa da stýdentterińizdiń shyǵarmashylyǵyna dańǵyl jol ashqan siz be?! Bálkim reıtıńi myqty «Traktorıstiń mahabbaty», «Mahabbatym júregimde» telehıkaıalaryna siz prodúser bolǵan shyǵarsyz? Bálkim qazaq qyzyna durys tárbıe beretin, onyń salt-dástúrlerdi qanshalyqty biletinin tekseretin «Qazaq arýy» baıqaýyn jyl saıyn siz ótkizetin bolarsyz? Emtıhan suraqtarynda nege sizdiń famılıańyz joq? Jumysyńyz sátsiz bolǵandyqtan, eshkim elemegendikten, meniń aty-jónimdi paıdalanyp ózińizge nazar aýdartpaqsyz ba? Qolyńyzdan keldi! – deıdi Esentaeva.
Sonymen qatar, Esentaeva kásibı etıkany ustanyp, «bireýdiń ómirine aralaspaýdy» ótindi. «Sizden ótinerim, kásibı etıkany ustanyp bireýdiń jeke ómirine aralaspańyz, onyń sizge esh qatysy joq. Jáne eldiń kózinshe meniń jeke ómirim qurdymǵa ketti dep jarıa salý – zıalylyqtyń belgisi emes, siz profesor emessiz be?! Bálkim kerisinshe, mende bári ońalyp, endi Otanym úshin eki ese kúshpen eńbek etetin shyǵarmyn, siz buny nege oılamadyńyz? Men sizge jeke ómirińizge baqyt tileımin, baqytty bolǵan kezde meniń ómirime qyzyqpaıtyn bolasyz», – dep málimdedi ol. Eske salaıyq, osyǵan deıin UBT suraqtaryna Baıan Esentaeva men Nurtas Adambaıdyń aty-jóni qosylǵany habarlanyp, keıin oǵan bilim jáne ǵylym mınıstri Erlan Saǵadıev túsinik bergen bolatyn.
