Otyrys qasiretti oqiǵa kezinde qaza tapqandardy bir minýt únsiz eske alýmen bastaldy.
– Prezidentimiz Qasym-Jomart Kemeluly Toqaev aitqandai, «táýelsizdik tarihynda biz alǵash ret asa kúrdeli jáne qaterli kezeńge tap boldyq». Elimiz osy kúnderi aýyr synaqty bastan ótkerdi. Syn saǵatta Memleket basshysynyń batyl sheshimder qabyldaýynyń jáne halqymyzdyń danalyǵy men sabyrlyǵynyń arqasynda qasiretti qańtar oqiǵalarynan óttik. Elimizdiń egemendigi men táýelsizdigin saqtap qaldyq. Qimas jandarynan airylǵan barsha otandastardyń qaiǵysyna taǵy da ortaqtasyp, kóńil aitamyn. Jaraqat alǵan, soqqy kórgen azamattardyń tezirek saýyǵyp ketýine tilektespin. Eń bastysy, eldiń tynyshtyǵy, adamdardyń amandyǵy ekenine taǵy da kózimiz jetti. Qiraǵan dúnie túzeler, órtengen ǵimarattar qalpyna keler, biraq júregimizge túsken syzat eshqashan óshpeidi, – dedi Baýyrjan Baibek.
Onyń aitýynsha, «Nur Otan» Memleket basshysy qoiǵan áleýmettik-ekonomikalyq saladaǵy naqty mindetterdi oryndaýǵa óziniń búkil resýrstaryn iske qosqan.
Partiianyń Májilistegi fraktsiiasy Prezident atap ótken máselelerdi oryndaýdyń zańnamalyq negizin qamtamasyz etý isine kirisip ketken. Máslihattardaǵy depýtattar jer-jerde halyqpen tikelei kezdesip, túsindirý jumystaryna belsene atsalysyp, sondai-aq qiratylǵan infraqurylymdardy qalpyna keltirýge úles qosýda. Bul rette partiianyń qoǵamdyq qabyldaýlary osy kúnderi turaqty jumys istedi. Partiianyń birneshe myń belsendisi «Halyq saqshysy» qoǵamdyq drýjinalar sapynda Almaty qalasynda qoǵamdyq tártip ornatýǵa atsalysyp, áskerilerge, politsiia jáne kommýnaldyq sala qyzmetkerlerine kómektesti. Sonymen qatar, partiia eriktileri tek Almaty qalasynyń ózinde 155 mln teńgeden astam somaǵa ártúrli kómek kórsetti.
– Qazirgi tańda partiianyń barlyq múmkindigi men kúsh-jigerin Prezident Qasym-Jomart Kemeluly Toqaev alǵa qoiǵan maqsat-mindetterdiń sapaly oryndalýyna jumyldyrýymyz kerek. Partiianyń qolynda qajetti tetiktiń bári bar. Biz byltyr el aýmaǵynda barlyq deńgeilerde qurylǵan 1 myń 700-den asa qoǵamdyq keńes jumysyn jolǵa qoidyq. Onyń quramynda 12 myńnan asa adam bar, úshten biri – qoǵam belsendileri, úkimettik emes uiym músheleri, kásipkerler, aqparat quraldarynyń ókilderi men blogerler. Byltyr olar nátijeli qyzmet jasap, kóptegen keleli usynystar berdi, birqatar kókeikesti problemalardyń sheshilýine muryndyq boldy. Qajetti tájiribe men múmkindikter bar. Sondyqtan, «Nur Otan»-nyń qoǵamdyq keńesteri Prezident bastamalaryn qoldap, berilgen tapsyrmalardyń jergilikti jerlerde tolyqqandy oryndalýyna kómektesýi kerek, – dep atap ótti ol.
Partiia Tóraǵasynyń Birinshi orynbasary atap ótkendei, aqpan aiynda «Nur Otan» depýtattarynyń qoǵamdyq reitingin qalyptastyrýǵa arnalǵan platforma jariia formatta iske qosylady.
– Qoǵamdyq reiting máslihat depýtattaryn halyqpen etene aralasyp, sailaýshylarmen turaqty túrde bailanys ornatýǵa yntalandyrý úshin jasalǵan bolatyn. Osy oqiǵalar bul bastamanyń qanshalyqty ózekti ári mańyzdy ekenin kórsetti. Halyq qalaýlylary – eń aldymen halyqpen qoian-qoltyq jumys isteýi tiis. Ashyq túrde, elmen etene jumys isteitin, qoǵamdyq jaýapkershilikti moinymen kótere alatyn bilikti depýttarymyz ben rezervtegi belsendi partiialastarymyz halyq talabyna sai laiyqty baǵasyn alýy tiis. Byltyr qyrkúiek aiynan bastap bul mehanizm barlyq óńirlerde synaqtan ótti. Aqpan aiynan bastap biz qoǵamdyq reiting nátijesin turaqty túrde jariialap otyratyn bolamyz, – dep málimdedi Baýyrjan Baibek.
Kezdesý barysynda partiia Tóraǵasynyń Birinshi orynbasary Tuńǵysh Prezidenttiń el tarihyndaǵy róline arnaiy toqtalyp, áleýmettik jelilerde partiia atyna aitylyp jatqan syndarǵa da jaýap berdi.
– Prezident Qasym-Jomart Kemeluly «Kúshimiz – birlikte!» dep barlyǵymyzdy ortaq maqsat jolynda toptasýǵa shaqyryp otyr. Qazaq «jumyla kótergen júk jeńil» deidi. «Nur Otan» partiiasy eldiń birligi men ishki turaqtylyqty saqtaýdyń mańyzyn únemi aityp keledi. Partiia tý etken osy máselelerdiń qanshalyqty mańyzdy ekenin ómirdiń ózi kórsetip otyr. Osyndai qiyn-qystaý kezde partiia jumysynan min izdep, «Parlament taratylsyn, partiia taratylsyn» degen maǵynada áńgime taratyp júrgender bar. Muny aitýshylar – «Nur Otan» partiiasy memlekettiliktiń, eldiktiń negizgi qoǵamdyq-saiasi tireginiń biri ekenin múldem túsinbeitinder. «Nur Otan» partiiasy qurylǵaly beri Qazaqstan memlekettiligin saqtaý úshin, qoǵam birligin bekem etý úshin jumys istep keledi. «Uly ister úndemei bitedi» demekshi, bul – dańǵoilyqqa salýǵa bolmaityn, kózge kórinbeitin ister. Sondyqtan biz aitylǵan qisyndy syndy kótere bilip, al, júiesiz sózge mán bermei, bel sheship jumys istegenimiz jón, – dep atap ótti ol.
Onyń aitýynsha, qazir Tuńǵysh Prezidentimiz týraly da nebir pikir aitýshylar kóbeigen. Tarih bezbenine salsaq, kez kelgen oqiǵanyń, ne tulǵanyń ótkendegi róline biryńǵai oń ne bolmasa tek qana teris dep baǵa berýge bolmaidy. Mysaly, Túrkiianyń tuńǵysh prezidenti Mustafa Kemal Atatúrik týraly da qarama-qaishy pikirler kóp. Biraq, ol zamanýi túrik memleketiniń negizin qalaýshy tarihi tulǵa bolyp qala bermek.
– Ótkenge baǵa berý árkimniń qolynan keledi, biraq aqiqat pen jalǵandy ajyratý árkimniń óz ar-uiatyna bailanysty. Eń qiyn kezeńde, iaǵni biz memleket bolamyz ba, bolmaimyz ba degen sonaý almaǵaiyp 90-shy jyldary Nursultan Ábishuly Nazarbaevtyń basshylyǵymen Qazaqstan Táýelsiz memleket bolyp qalyptasty, etek-jeńin jidy. Tóńiregimen terezesi teńesti. Jalpy álemdik qaýymdastyq moiyndady. Elbasy men sol kezdegi aǵa urpaqtyń 30 jyl boiy memlekettiliktiń irgesin bekitip, shekarasyn shegendep, territoriiasynyń tutastyǵyn saqtaýǵa sińirgen eren eńbegi ult tarihynda óziniń oń baǵasyn alary sózsiz. Al, osy jyldary keteýi ketken dúnieni tezirek túzeýimiz kerek. Ol – sózsiz. Prezident jariialaǵan reformalardyń da máni osy. Biraq, Memleket basshylyǵynan ketken Nursultan Nazarbaevty jata jamandaý – eldigimizge, azamattyǵymyzǵa syn, – dedi ol.
Baýyrjan Baibek atap ótkendei, 30 jylǵa endi tolǵan Táýelsizdigimizdi baiandy etý úshin qazaqstandyq qoǵamda memlekettiliktiń dástúrin, onyń ishinde bilik sabaqtastyǵynyń dástúrin qalyptastyra bilýimiz shart.
– Biz úshin qazir eldigimizdi saqtaý, bardy uqsatý asa mańyzdy. Sondyqtan Elbasy qurǵan «Nur Otan» partiiasy eldiń birligi men qoǵamnyń turaqtylyǵyna baǵyttalǵan jumysyn odan ári jalǵastyrýy kerek. Qazirgi tańda biz alda bolatyn kezekten tys Sezd jumysyna daiyndyqty bastap kettik. Qańtardyń qasiretti kúnderinde Elbasy barshamyzdy Prezidenttiń mańaiyna toptasyp, eldiń amandyǵy men birligin saqtap qalý úshin birge áreket etýge úndegenin barshańyz bilesizder. Kim ne dese de, «Nur Otan» partiiasy – Prezident jariialaǵan reformalardy tolyq jáne sapaly júzege asyrýǵa áleýeti tolyq jetetin birden-bir qoǵamdyq-saiasi kúsh. Partiiamyz Memleket basshysy alǵa qoiǵan mindetterdi oryndaý úshin bar kúsh-jigerin – qoǵamdyq uiymdardy, depýtattyq fraktsiialardy, túrli qyzmette júrgen 800 myńǵa tarta barlyq múshesin ortaq maqsatqa jumyldyrýǵa daiyn, – dep túiindedi ol.
Otyrys barysynda Almaty qalasy, Mańǵystaý, Jambyl oblystyq filialdary tóraǵalarynyń birinshi orynbasarlary, sonymen qatar «Jas Otan» jastar qanatynyń tóraǵasy qazirgi tańda partiia tarapynan jergilikti ákimdikterge infraqurylymdardy qalpyna keltirý, qoǵamdyq tártipti nyǵaitý, volonterlar qyzmetin úilestirý jáne basqa da atqarylyp jatqan jumystar boiynsha aqparat berdi.
https://www.youtube.com/watch?v=ZWzPjX4d5tc
