Batys Qazaqstan oblysy ákimi óz sózinde eń aldymen Memleket basshysy Qasym-Jomart Kemeluly Toqaevtyń «Egemen Qazaqstan» gazetinde jariialanǵan «Biz ozyq oily ult retinde tek qana alǵa qaraýymyz kerek» degen maqalasy aiasynda óńirimizde júzege asyp jatqan jumystarǵa keńinen toqtaldy. Maqalada qozǵalǵan basty jobalardy júzege asyrýda, ásirese jastardyń róli basym ekenin aitqan óńir basshysy elimizde tuńǵysh ret halyqty qaladan aýyldyq jerlerge kóshirýge baǵyttalǵan «Qaladan aýylǵa» pilottyq jobasy iske qosylatynyn habarlady.
– Prezidenttiń tapsyrmasy aiasynda ótken jyly elimizde aýyldyq aimaqtardy damytýdyń 2023-2027 jyldarǵa arnalǵan Tujyrymdamasy qabyldandy. Osynyń aiasynda BQO-da halyqty qaladan aýyldyq jerlerge kóshirý boiynsha pilottyq jobany iske asyratyn bolamyz. Bul týǵan jerge týymyzdy tigý úshin, qara shańyraqtyń tútinin qaita jańǵyrtý, aýyldarymyzdy iesiz qaldyrmaý jáne jańǵyrtý úshin bastalyp jatyrǵan joba.
Biz aýylǵa kóship baramyn degen azamattarǵa óz tarapymyzdan memlekettik baǵdarlamalardy paidalana otyryp jáne jergilikti biýdjettiń múmkindikterin eskere otyryp barynsha qoldaý bildiremiz. Ótken jyly aýyldyq jerlerge barǵan dárigerlerge 2,5 mln teńgeden 5 mln. teńgege deiin qarjylai kómek kórsetildi. Biylǵy jyly bul qarajattyń kólemin 5 mln. teńgeden 8 mln. teńgege deiin kóbeitýdi josparlap otyrmyz. Sońǵy 3 jylda aýyldyq jerlerge 3 616 adam qonys aýdarǵan, – dedi Nariman Tóreǵaliev.
Qaladan aýylǵa qonys aýdarǵan jastardyń biri Elvira Amanova shara barysynda memlekettik qoldaýdyń mańyzdylyǵyn atap ótti.
– Otaý qurǵaly 10 jyl boiy joldasymyz ekeýimiz páter jaldap turdyq. Endigi kezekte otbasymyzben Báiterek aýdanynyń Chirov aýylyna qonys aýdardyq. Osy pilottyq joba aiasynda óz isimizdi bastamaq niettemiz. Osyndai joba áleýmettik jaǵdaiyn túzei almai júrgen talai jandarǵa týǵan jerine, aýylyna baryp, tek qana jaǵdaiyn ǵana túzep qana qoimai, elimizdiń órkendeýine de óz úlesin qosar edi, – dedi Elvira Oralbekqyzy.
Jiyn barysynda oblys ákimi jastarǵa arnalǵan turǵyn úi baǵdarlamasyn iske asyrý maqsatynda «Otbasy bank» AQ BQO filialy basshysymen arnaiy memorandýmǵa qol qoidy. Bul memorandým nátijesinde «Otbasy bank»-pen birlese 35 jasqa deiingi jastarǵa jeńildetilgen nesie berilmek. Osy oraida, BQO-da turǵyn úi alýǵa 600 mln. teńge kóleminde qarajat bólinip, jas otbasylardy baspanamen qamtý josparlanyp otyr.
Budan bólek, is-sharada elimizdegi Prezidenttik jastar kadrlyq rezervi jobasy týraly da aityldy. Batys Qazaqstan oblysy boiynsha Prezidenttik jastar kadr rezervine ilikken 4 maman basqarýshylyq laýazymdarda jumys istep júr. Al, biylǵy iriktelenip alynǵan jastardyń ekeýi Batys Qazaqstan oblysynyń týmalary. Olardy qazirgi ýaqytta jumysqa ornalastyrý boiynsha tiisti sharalar atqarylyp jatyr.
