Qazaqstanda el aldynda erekshe eńbegi sińgen nemese tótenshe jaǵdailardyń saldarynan zardap shekken azamattarǵa qosymsha áleýmettik kómek retinde respýblikalyq biýdjetten ai saiyn arnaiy memlekettik járdemaqy (AMJ) tólenedi, dep habarlaidy Dalanews.kz.
Eńbek jáne halyqty áleýmettik qorǵaý ministrliginiń málimetinshe, 2025 jylǵy 1 qarashadaǵy jaǵdai boiynsha arnaiy memlekettik járdemaqy alýshylardyń sany 207 780 adamdy qurap, olarǵa jalpy 22,3 mlrd teńge tólendi.
Bul memlekettik qoldaý túri Qazaqstanda 1999 jyly engizilgen jáne halyqty áleýmettik qorǵaý júiesiniń mańyzdy quramdas bóligi sanalady.
Arnaiy memlekettik járdemaqy alýǵa Qazaqstan Respýblikasynyń zańnamasynda aiqyndalǵan 17 sanattaǵy azamattardyń quqyǵy bar. Olardyń qataryna jatatyndar:
- Uly Otan soǵysynyń ardagerleri jáne ózge memleketterdiń aýmaǵyndaǵy áskeri is-qimyldarǵa qatysqan ardagerler;
- Otan soǵysy ardagerlerine jeńildikter boiynsha teńestirilgen tulǵalar;
- Otan soǵysynda qaza tapqan jaýyngerlerdiń jesirleri jáne qaza bolǵan áskeri qyzmetshilerdiń otbasylary;
- «Halyq qaharmany», «Qazaqstannyń Eńbek Eri» siiaqty joǵary dárejeli marapattarǵa ie bolǵan tulǵalar;
Tyl eńbekkerleri;
- Chernobyl AES-indegi apattyń zardaptaryn joiýǵa qatysýshylar;
- Saiasi qýǵyn-súrgin qurbandary, onyń ishinde múgedektigi bar nemese zeinetker jastaǵy azamattar;
- Qazaqstan Respýblikasy aldynda sińirgen erekshe eńbegi úshin taǵaiyndalǵan zeinetaqy alýshylar jáne ózge de sanattaǵy azamattar.
Járdemaqynyń mólsheri alýshynyń sanatyna bailanysty jáne 2,13-ten 138,63 ailyq eseptik kórsetkishke (AEK) deiingi kólemde belgilenedi. AMJ mólsheri respýblikalyq biýdjet týraly zańmen aiqyndalatyn AEK kóleminiń artýyna orai jyl saiyn ósip otyrady.
Sondai-aq, AMJ alýǵa birneshe negizi bar tulǵalarǵa járdemaqy olardyń óz tańdaýy boiynsha tek bir negiz boiynsha ǵana tólenetini atap ótiledi.
