قازاقستاندا ەل الدىندا ەرەكشە ەڭبەگى سىڭگەن نەمەسە توتەنشە جاعدايلاردىڭ سالدارىنان زارداپ شەككەن ازاماتتارعا قوسىمشا الەۋمەتتىك كومەك رەتىندە رەسپۋبليكالىق بيۋدجەتتەن اي سايىن ارنايى مەملەكەتتىك جاردەماقى (امج) تولەنەدى، دەپ حابارلايدى Dalanews.kz.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، 2025 جىلعى 1 قاراشاداعى جاعداي بويىنشا ارنايى مەملەكەتتىك جاردەماقى الۋشىلاردىڭ سانى 207 780 ادامدى قۇراپ، ولارعا جالپى 22،3 ملرد تەڭگە تولەندى.
بۇل مەملەكەتتىك قولداۋ ءتۇرى قازاقستاندا 1999 جىلى ەنگىزىلگەن جانە حالىقتى الەۋمەتتىك قورعاۋ جۇيەسىنىڭ ماڭىزدى قۇرامداس بولىگى سانالادى.
ارنايى مەملەكەتتىك جاردەماقى الۋعا قازاقستان رەسپۋبليكاسىنىڭ زاڭناماسىندا ايقىندالعان 17 ساناتتاعى ازاماتتاردىڭ قۇقىعى بار. ولاردىڭ قاتارىنا جاتاتىندار:
- ۇلى وتان سوعىسىنىڭ ارداگەرلەرى جانە وزگە مەملەكەتتەردىڭ اۋماعىنداعى اسكەري ءىس-قيمىلدارعا قاتىسقان ارداگەرلەر؛
- وتان سوعىسى ارداگەرلەرىنە جەڭىلدىكتەر بويىنشا تەڭەستىرىلگەن تۇلعالار؛
- وتان سوعىسىندا قازا تاپقان جاۋىنگەرلەردىڭ جەسىرلەرى جانە قازا بولعان اسكەري قىزمەتشىلەردىڭ وتباسىلارى؛
- «حالىق قاھارمانى»، «قازاقستاننىڭ ەڭبەك ەرى» سياقتى جوعارى دارەجەلى ماراپاتتارعا يە بولعان تۇلعالار؛
تىل ەڭبەككەرلەرى؛
- چەرنوبىل اەس-ىندەگى اپاتتىڭ زارداپتارىن جويۋعا قاتىسۋشىلار؛
- ساياسي قۋعىن-سۇرگىن قۇرباندارى، ونىڭ ىشىندە مۇگەدەكتىگى بار نەمەسە زەينەتكەر جاستاعى ازاماتتار؛
- قازاقستان رەسپۋبليكاسى الدىندا سىڭىرگەن ەرەكشە ەڭبەگى ءۇشىن تاعايىندالعان زەينەتاقى الۋشىلار جانە وزگە دە ساناتتاعى ازاماتتار.
جاردەماقىنىڭ مولشەرى الۋشىنىڭ ساناتىنا بايلانىستى جانە 2،13-تەن 138،63 ايلىق ەسەپتىك كورسەتكىشكە (اەك) دەيىنگى كولەمدە بەلگىلەنەدى. امج مولشەرى رەسپۋبليكالىق بيۋدجەت تۋرالى زاڭمەن ايقىندالاتىن اەك كولەمىنىڭ ارتۋىنا وراي جىل سايىن ءوسىپ وتىرادى.
سونداي-اق، امج الۋعا بىرنەشە نەگىزى بار تۇلعالارعا جاردەماقى ولاردىڭ ءوز تاڭداۋى بويىنشا تەك ءبىر نەگىز بويىنشا عانا تولەنەتىنى اتاپ وتىلەدى.
