Taldyqorǵanda biýdjet qarjysyna salynǵan zaýyt jumys istemei tur, - dep habarlaidy Dalanews.kz.
Bul týraly jergilikti turǵyn málimdedi. Zaýyt Amandyq Batalov ákim bolǵan tusta 1,3 milliard teńgege salynǵan. Bul maily daqyldardy óńdeý zaýyty bolǵan.
«Bul - «eles» zaýyt, jai ǵana mýliaj. Ol jerdegi qurylǵylardyń barlyǵy jumys istemeidi. Olardan aqaý shyǵyp, zaýytta jumys istegen adamdar zardap shekken. Qurylǵylar istese de ary ketse eki ai ǵana jumys istep turdy. Sonda 1,3 milliard teńge qaida ketti? Bul suraqtyń jaýabyn eshkim anyqtaǵysy kelmeidi», - deidi turǵyn.
Taldyqorǵan turǵynynyń sózinshe, quzyrly organdar zaýyttyń istemei turǵanynan habardar bolǵanymen, eshqandai shara qoldanbai otyr eken.
«Memleket, prokýratýra, tergeý organdary bárin bilip otyr. Biyldyń ózinde prezident ákimshiligine deiin úndeý jasadym. Biraq memleket qarjysy qaida jumsalǵanyn eshkim anyqtaǵysy kelmeidi. Onyń artynda kim turǵanyn, nege bulai istep otyrǵandaryn bilmeimin. Eger qarapaiym adam memleketke 1,3 milliard qaryz bolsa, ony baiaǵyda túrmege qamap tastar edi», - deidi turǵyn.
Onyń sózinshe, zaýytta durys jumys istemei qalǵan qurylǵylardyń kesirinen jaraqat alǵan qyzmetkerlerge áli kúnge deiin ótemaqy tólenbegen.
