Búgin Almaty oblysynyń ákimi Amandyq Batalov el aldyna shyǵyp koronavirýs tóńiregindegi barsha saýalǵa jaýap berip, atqarylǵan sharalar men qazirgi aýmaqtaǵy ahýalǵa toqtaldy.
Búgingi kúni oblysta koronavirýsqa shaldyqqan naýqastar sany 305-ke jetken. Onyń 181-i dertten qulan-taza aiyqqan. Meditsina qyzmetkerleriniń baqylaýynda 1415 adam bar. Úi karantininde 1085 adam jatyr. Qazirgi tańda indettiń 31 aimaqta karantin rejimi alynǵan.
Almaty oblysynda Taldyqorǵan, Kegen, Talǵar aýdandary indettiń oshaǵy bolyp otyr. Qazirgi kezde koronavirýsqa shaldyqqandardy anyqtaý úshin 6 zerthana jumys ásteýde. Aldaǵy ýaqytta taǵy bir zerthana óz qyzmetine kirisedi.
Memleket pandemiia kezinde halyqtyń turmystyq jaǵdaiynda nazardan tys qaldyrmady. Máselen, tek Almaty oblysynyń 545 myń turǵyny 42500 teńge kólemindegi áleýmettik tólemge qol jetkizgen. Kommýnaldyq tólemdi óteýge qatysty 15 000 teńgeni alýǵa oblysta 24 myń adam ótinish qaldyrǵan.
Karantin rejimin kezeń-kezeńimen jeńildetý barysynda áýe qatynasy qaita jolǵa qoiyldy. Búgingi kúni aidyndy Alakólge, Nur-Sultan jáne Almaty qalalarynan kúnine 6 márte ushaq qatynaidy. Al Taldyqorǵan qalasynan Úsharal jerine táýligine eki ret áýe kemesi kókke kóteriledi.
Almaty oblysy ákiminiń aitýynsha, 13 maýsymnan bastap Alakólde demalys maýsymy ashylmaq. Al, shomylý maýsymyna aýa-raiy jylynǵan kezde ǵana ruqsat berilmek.
– Qaladaǵy saiabaqtar ázirge ashyq. Tek, demalys oryndarynda, qoǵamdyq jerde sanitarlyq talaptardy qatań saqtaýy mindetti. Ara qashyqtyqty da umytpaǵan abzal, – dedi Amandyq Ǵabbasuly.
1 maýsym kúni taǵy da indetke qarsy kúres komissiiasynyń otyrysy ótedi. Sol kezde karantin rejimin alyp, almaý máselesine naqty jaýap beriletin bolady.
«Alǵash ret oblys ortalyǵynda koronavirýsqa shaldyqqan alǵashqy naýqas tirkelgende ol syrttan kelgen adamnan taraǵan belgili. Sondyqtan blok-beketterdegi tártipti kúsheitý mańyzdy. Áli de bolsa virýs bar. Karantin rejimin saqtap, mamandardyń eskertýine qulaq asyńyzdar. Elimizde indettiń taralýy órship ketken jaǵdaida biz oblysta qatań rejimge kóshýge májbúr bolamyz, – dedi.
Sóz sońynda óńir basshysy oblystaǵy meiramhana-kafeler áli ashylmaitynyn aitty. Balabaqshalar da áli jumys istemeidi.
- Bazarlarda maskasyz júrgen jurt kóp. Bulai bolmaidy. Birinshi kezekti jaqyndaryńyzdy, balalaryńyzdy oilańyz. Olardy aialaý kerek. Jaýapkershilik maska kiiýden bastalady. Qalypty ómirge qaityp oralýdy qalasaq jáne jańa indet oshaqtary paida bolmaý úshin karantin talaptaryn saqtaý mindet, – Batalov.
Oblys ákimi osy sózimen barsha halyqty sanaly túrde saqtyq talaptaryn oryndaýǵa shaqyrdy.
Anar SABYROVA, Almaty oblysy.
