Búgin Almatyǵa Litvadan kisi óltirip, qarýdy zańsyz saqtady degen kúdikpen 17 jyl boiy izdestirilgen qazaqstandyq ekstraditsiialandy, dep habarlaidy Dalanews.kz Bas prokýratýraǵa silteme jasap.
Bas prokýratýranyń málimetinshe, 2007 jyly kúdikti men onyń sybailasy zańsyz paida tabý maqsatynda Almatyǵa kelgen.
«Olardyń qylmystyq áreketi ózge qylmystyq orta ókilderimen janjalǵa ákelip soqqan, sol sebepti olardyń bireýin óltirýge sheshim qabyldaǵan. 2008 jyly 19 mamyr kúni qylmyskerler ózderiniń qylmystyq nietterin júzege asyryp, jábirlenýshini óz úiiniń aýlasynda ańdyp júrip, oǵan tapanshadan birneshe ret oq atqan.
Alǵan jaraqattarynyń saldarynan er adam oqiǵa ornynda kóz jumǵan. Qylmys jasalǵannan keiin kúdiktilerdiń biri ustalyp, keiin sottalǵan, al ekinshisi boi tasalap úlgergen. Osyǵan bailanysty ol halyqaralyq izdeýge jariialanǵan», — dep habarlady prokýratýra.
Bas prokýratýranyń málimetinshe, kúdikti óz derekterin ózgertip, Eýropada jasyrynyp júrgen. 2025 jylǵy tamyz aiynda ol Litva shekarasynan ótý kezinde ustalǵan. Keiin ol Qazaqstanǵa ekstraditsiialandy.
Qazirgi ýaqytta ol tergeý izoliatoryna qamaldy. Aiyptalyp otyrǵan qylmystar úshin 10 jyldan 25 jylǵa deiingi merzimge nemese ómir boiy bas bostandyǵynan aiyrý, sondai-aq múlkin tárkileý túrindegi jaza kózdelgen.
