بۇگىن الماتىعا ليتۆادان كىسى ءولتىرىپ، قارۋدى زاڭسىز ساقتادى دەگەن كۇدىكپەن 17 جىل بويى ىزدەستىرىلگەن قازاقستاندىق ەكستراديسيالاندى، دەپ حابارلايدى Dalanews.kz باس پروكۋراتۋراعا سىلتەمە جاساپ.
باس پروكۋراتۋرانىڭ مالىمەتىنشە، 2007 جىلى كۇدىكتى مەن ونىڭ سىبايلاسى زاڭسىز پايدا تابۋ ماقساتىندا الماتىعا كەلگەن.
«ولاردىڭ قىلمىستىق ارەكەتى وزگە قىلمىستىق ورتا وكىلدەرىمەن جانجالعا اكەلىپ سوققان، سول سەبەپتى ولاردىڭ بىرەۋىن ولتىرۋگە شەشىم قابىلداعان. 2008 جىلى 19 مامىر كۇنى قىلمىسكەرلەر وزدەرىنىڭ قىلمىستىق نيەتتەرىن جۇزەگە اسىرىپ، جابىرلەنۋشىنى ءوز ءۇيىنىڭ اۋلاسىندا اڭدىپ ءجۇرىپ، وعان تاپانشادان بىرنەشە رەت وق اتقان.
العان جاراقاتتارىنىڭ سالدارىنان ەر ادام وقيعا ورنىندا كوز جۇمعان. قىلمىس جاسالعاننان كەيىن كۇدىكتىلەردىڭ ءبىرى ۇستالىپ، كەيىن سوتتالعان، ال ەكىنشىسى بوي تاسالاپ ۇلگەرگەن. وسىعان بايلانىستى ول حالىقارالىق ىزدەۋگە جاريالانعان»، — دەپ حابارلادى پروكۋراتۋرا.
باس پروكۋراتۋرانىڭ مالىمەتىنشە، كۇدىكتى ءوز دەرەكتەرىن وزگەرتىپ، ەۋروپادا جاسىرىنىپ جۇرگەن. 2025 جىلعى تامىز ايىندا ول ليتۆا شەكاراسىنان ءوتۋ كەزىندە ۇستالعان. كەيىن ول قازاقستانعا ەكستراديسيالاندى.
قازىرگى ۋاقىتتا ول تەرگەۋ يزولياتورىنا قامالدى. ايىپتالىپ وتىرعان قىلمىستار ءۇشىن 10 جىلدان 25 جىلعا دەيىنگى مەرزىمگە نەمەسە ءومىر بويى باس بوستاندىعىنان ايىرۋ، سونداي-اق مۇلكىن تاركىلەۋ تۇرىندەگى جازا كوزدەلگەن.
