Redaktsiiamyzǵa óz aiaǵymen kelgen Nuraly Qalievtiń alǵashqyda nege narazy ekenin túsinbedik. Artynan uqtyq. Uly oilamaǵan jerden isti bolyp, tergeýde otyr eken. Qamaýda. Ádildik izdep barmaǵan jeri joq. Tym-tyrys. Aqyr aiaǵy aqparat quraldaryna aitýdy jón kórgen.
"Ulymdy jazyqsyz qamap tastady»
"Ulym Aqmola oblysy Tselingrad aýdanyna qarasty Talapker aýylynyń ákimi bolǵan. Qazir abaqtyda jatyr. Jazyqsyzdan jazyqsyz..." deidi Nuraly Qaliev.
Ári qarai bolǵan jaǵdaidy baiandap berdi.
Aitýynsha, osydan 2 jyl buryn 6 naýryzda Talapker aýylynyń ákimi Nurtýǵan Muzamelov aýyldaǵy 41 jer ýchaskisine qatysty tekserý júrgizý qajettigin aityp, birqatar organdarǵa shaǵym joldaǵan.
Arada bir apta ótkesin ákimniń shaǵymy boiynsha Tselingrad aýdanynyń politsiiasy atalǵan jer ýchaskileri boiynsha qylmystyq is qozǵaidy. Biyl 29 mamyr kúni «jer ýchaskeleriniń qujattarynda jalǵandyq bolýy múmkin» dep shaǵym aitqan ákimniń ózi kúdikke ilinip, qamaýǵa alynǵan. Taqqan aiyp aýyr.
– Soraqysy sońynda ulymdy kináli qyldy. Alaiaqtyqpen ainalysty, uiymdasqan qylmystyq toptyń múshesi boldy degen ilik taýyp jaýyp tastady túrmege. "Ulyńyz aýyldaǵy 45 jer ýchaskisiniń jalǵa alý merzimin uzartý týraly zańsyz sheshim shyǵarǵan" dedi. Joq, bulary nesi? Aqylǵa siia ma osy, qisynǵa kele me? – deidi Nuraly Qaliev.
Aqylǵa siia ma degeni, uly politseilerge ózi habarlasqan.
– Oilap kórińizshi, organdarǵa ózi habarlasqan. Jer ýchaskisine qatysty barmaq basty, kóz qysty árekettiń baryn ańdaǵan adam aqyr aiaǵy abaqtydan bir-aq shyqty. Joq, bul qalai? – deidi.
Osy arada bir saýal týyndaidy: Politsiia aldymen ákimdi nege quryqtady?
Sebebi, ilgeridegi jer ýchaskilerin jalǵa alý merzimin uzartý týraly qujattarda ákimniń qoly tur.
– Bul bylai... ulymnyń atynan ózge bireý qol qoiǵan. Qoltańbasy ainymaidy. Áýelde solai aittyq. Tergedi. Tekserdi. Ulymnyń qoly qoiylǵan qujattardy áldebir N. esimdi áiel tirkegen bolyp shyqty. Qas qylǵanda, qaitys bolypty. Qiyndyǵy sonda. Ólgen adamnan ulymnyń qoltańbasyn ainytpai qoiǵanyn qalai anyqtaisyń?! – deidi Nuraly Qaliev.
Onyń aitýynsha, ákim qol qoidy degen qujattar saraptamadan ótkizilgen. Saraptamalyq sot qujattaǵy ákimniń qoly jalǵan ekenin dáiektegen. Iaǵni, ákimniń syrtynan basqa bireý qol qoiǵan...
Nuraly Qaliev ulynyń ymyraǵa kónbei, jalǵandyqqa jol bermeý úshin bastaǵan isi óz basyna taiaq bop tigenin aitady. «Qujattaǵy qol ulymdiki emes ekenin bile tura, bul isti qysqartqan joq. Áli tergeý júrip jatyr. Elimizde ózi ádilet bar ma?», – dep kúiinedi ol.
[caption id="attachment_30968" align="alignleft" width="448"]
Taǵy bir saýal...
Politsiia Nurtýǵan Muzamelovtiń uiymdasqan qylmystyq topqa qatysy baryna qalai kóz jetkizgen?
– Jer ýchaskisin "jekemenshiktep" alǵan qylmysty top bar. Kinási de dáleldengen. Biraq dál meniń ulymnyń oǵan qatysy joq. Dálel taba almady. Ilik taba almady. Endeshe onyń qamaýyn nege uzartyp otyr? Álde munyń bárin ulyma aýdara salmaq pa? Ulymdy kináli qylmaq pa? Ákimdi aiyptai salý ońai shyǵar olar úshin?
Másele mynada. Aiyptaý tergeý kezindegi qylmystyq top serkesiniń jaýaptaryna ǵana negizdelgen. Boldy. Basqa eshteńe joq. Kózben kóretin, qolmen ustaityn, – deidi ákimniń ákesi.
Al qylmystyq toptyń jetekshisi budan buryn da qoly bylǵanǵan. Qol astyna 20-dan asa adamdy toptastyrǵan. Qazir bostandyqta júr eken...
– Senesizder me, erkindikte júr! Tergeýshiler de sonyń sózin sóileitin siiaqty. «Qylmystyq toptyń serkesi» retinde tanylǵan adam «tergeý isine kómektesemin» dep, meniń ulymdy kinálap, ózi bostandyqta júr. Bizde zań bar ma ózi? Ne túrli qylmys jasap, aram jolmen baiyǵan adam bostandyqta júr. Al meniń ulym abaqtyda otyr, – deidi Nuraly Qaliev.
Al aýyl aqsaqaldary, turǵyndary túrmedegi ákimge arasha túsýde. "Saýatty, bilikti ákim edi. Aýyldyń taǵdyryna jany ashityn" deidi olar.
Nurtýǵan Muzamelov Talapker aýylynyń ákimi qyzmetine 2014 jyly taǵaiyndalǵan. Jap-jas jigit. 83 jylǵy. Mamandyǵy – zańger. Ákesiniń aitýynsha, jer ýchaskesine qatysty qujattaǵy shikilikti aldymen ańǵarýy da mamandyǵymen bailanysty. Órimdei úsh balasy bar. Nuraly Qaliev nemereleriniń «Ákem qashan keledi?» degen suraǵyna júregi ezilip, aitar sóz tappai qinalatynyn aitady.
Nuraly Qaliev sóz sońynda bul isti Bas prokýror Jaqyp Asanovtyń nazaryna jetkizgisi keletinin, sol kisiden kómek bolar, ádildik ornar degen nieti baryn jetkizdi. Bul oqiǵa gazet nazarynda bolady.
Redaktsiiadan: Bolǵan jaidy barynsha yqshamdap berdik.
