Bas prokýratýra telefon alaiaqtyq derekteriniń kúrt artqanyna bailanysty azamattarǵa eskertý jasady. Vedomstvo málimetinshe, biyl telefon alaiaqtary 6,1 myńnan astam qazaqstandyqty aldaǵan, dep habarlaidy Dalanews.kz.
Qadaǵalaý organynyń habarlaýynsha, alaiaqtardyń tásilderi kúrdelengenimen, negizgi shema ózgermei otyr. Ádette jábirlenýshiniń telefonyna «1414» qysqa nómirinen SMS-kod keledi. Osydan keiin alaiaqtar ózderin memlekettik organ, bank nemese kýrerlik qyzmet ókili retinde tanystyryp, kelgen kodty aitýyn suraidy.
Budan soń ekinshi qońyraý shalynyp, qaskúnemder ózin bank, politsiia nemese UQK-niń «qaýipsizdik qyzmeti» retinde kórsetedi. Keibir jaǵdailarda olar beinebailanysqa da shyǵady. Alaiaqtar aldyńǵy qońyraý arqyly alynǵan kodtyń negizinde jábirlenýshiniń atyna nesie rásimdelýi nemese shotynan aqsha alynýy múmkin ekenin aityp, «qaýipsiz shotqa» qarajat aýdarýdy usynady. Dál osy sátte naqty alaiaqtyq jasalyp, jábirlenýshi iri kólemde qarjylai shyǵynǵa ushyraidy.
Bas prokýratýranyń málimetinshe, buryn «1414» nómirinen SMS-kod alý úshin tek jábirlenýshiniń telefon nómirin engizý jetkilikti bolǵan. Alaida qazir bul júiege qol jetkizý tek biometriialyq aýtentifikatsiia (FaceID), elektrondyq tsifrlyq qoltańba (ETsQ) nemese eGov QR arqyly júzege asyrylady. 2025 jyldyń jeltoqsan aiynan bastap atalǵan talaptardy engizbegen júieler «1414» SMS-shliýzinen ajyratylǵan.
Vedomstvo bul sharalar azamattardy alaiaqtardan qorǵaýdy kúsheitýge baǵyttalǵanyn atap ótti.
Sonymen qatar Bas prokýratýra qazaqstandyqtarǵa birqatar mańyzdy erejelerdi eske saldy. Memlekettik organdar men bankter eshqashan SMS-kodtardy, bank kartasynyń derekterin nemese qupiiasózderdi suramaidy. Sondai-aq «qaýipsiz shot» degen uǵymnyń joq ekenin eskertti.
Azamattarǵa kúdikti qońyraýlar kezinde saq bolýǵa, jeke derekterin bógde adamdarǵa bermeýge jáne kúmán týǵan jaǵdaida birden bankke nemese ýákiletti memlekettik organdarǵa habarlasýǵa keńes berildi. Sonymen birge kibergigiena talaptaryn saqtap, tek resmi qosymshalar men servisterdi qoldaný qajettigi aityldy.
