Qadirli musylman qaýym!
Sizderdi isi musylman balasynyń ulyq merekesi – oraza aitpen shyn júrekten quttyqtaimyn! Ait qabyl bolsyn!
Otbasyńyzǵa baqyt pen bereke, denińizge saýlyq, jumysyńyzǵa tabys tileimin.
Oraza ait – júrekke qýanysh pen meiirim syilaityn, adamzat balasyn izgilikke, dostyq pen baýyrlastyqqa, qanaǵat pen qaiyrymdylyqqa úndeitin meiram.
Ait sózi – merekeleý, hal surasý, bir-birin qýantý, qýanyshqa toptalý, qarymta degen uǵymdy bildiredi. Oraza ait – qasietti Ramazan aiynyń aiaqtalǵanyn bildiretin mereke.
Jer betindegi kúlli musylman úmbeti ait kúnderi hal surasyp, bir-birin quttyqtap, máre-sáre kúi keshedi. Sonymen qatar, kómekke muqtaj jandarǵa járdemdesip, olardy da qýanyshqa bóleidi.
Alla Taǵala: «...Olar Men úshin oraza ustady, Meniń pármenimmen aýyz ashty, endi qýanyshqa kenelsin...» deidi. Jaratýshy Iemiz siz ben bizdiń qýanyshty kúnderimizdi eselei tússin dep tileimin.
Oraza ait – otbasylyq mereke. Ait kúnderi ata-anamyzdy, ul-qyzdarymyzdy, aǵa-baýyrlarymyzdy qýanyshqa keneltip, qaraýsyz qalǵan qarttarǵa, jetimder men múgedek jandarǵa kómektesýdiń saýaby mol.
Qazaqstan musylmandary dini basqarmasy qasietti Ramazan aiynda elimiz boiynsha aýyzashar qoraptaryn taratyp, qaiyrymdylyq jobalardy júzege asyrdy. Saýaptar eselenip jazylatyn berekeli aida igi iske atsalysqan eriktilerge, demeýshi azamattar men jomart jandarǵa riiasyz nietpen airyqsha alǵysymdy bildiremin.
Elimizdegi pandemiialyq jaǵdaidy eskerip, Dini basqarmanyń pátýasy men meshit tártibine baǵynyp, qulshylyǵyn úide oryndap, orazasyn oqshaý túrde ustaǵan jamaǵatqa da Alla razy bolsyn aitamyn!
Qurmetti jamaǵat!
Alla Taǵala otyz kún boiy ustaǵan orazamyzdy, jasaǵan duǵamyzdy, járdemge muqtaj jandarǵa úlestirgen sadaqamyzdy qabyl etkei!
Ár otbasyna amandyq, jaqsylyq tileimin. Orazadan orazaǵa deiin aman-esen jete bereiik! Jer betinen juqpaly dert joiylyp, merekeli, berekeli sátterde júzdesýdi jazǵai! Elimiz aman, jurtymyz tynysh bolǵai! Ámin!
Naýryzbai qajy TAǴANULY,
Qazaqstan musylmandary dini basqarmasynyń tóraǵasy, Bas múfti
