Almaty oblysynda 2 bólmeli páter jalǵa alyp, kún kórip júrgen otbasynyń taǵdyry týraly alǵash bolyp telearnalarda aitylǵan bolatyn. Din qyzmetkerleri kópbalaly ananyń jaǵdaiy týraly materialdy kórgen soń bul máselege bei-jai qarai almady. Nátijesinde baspanany armandaǵan kópbalaly otbasy úili boldy. Jańa úige kóshken otbasyna Bas múfti Erjan qajy Malǵajyuly arnaiy baryp, jaǵdailarymen tanysyp, úide tutynýǵa qajetti dúnielerdi syi retinde tabystady.
«Búgin aq túieniń qaryny jarylǵan kún. Óitkeni, telearnalardan kómek suraǵan kópbalaly ana týraly jańalyqty kórgenen keiin, qol ushyn sozyp járdem beremiz dep sheshtik. Eki jarym aida osy úidi salyp, otbasynyń igiligine berip otyrmyz. Bul atqaryp jatqan igi jumystarymyzdy kópshilikke kórsetpeýimizgede bolatyn edi. Biraq, bul jumys basqa qaltaly azamattarǵa ǵibrat bolsa eken degen nietimiz bar. Alla Taǵala osy januiaǵa bereke bersin. Kishtentai búldirshinder halqyna qyzmet etetin azamat bolsyn», – dep batasyn berdi Bas múfti Erjan qajy Malǵajyuly.
Buǵan deiin páter jaldap, ómirdiń taýqymetin sezingen kópbalaly otbasynyń otaǵasy Marat Baisynov Bas múfti Erjan qajy Malǵajyulyna alǵys aityp, rizashylyǵyn jetkizdi. Jańadan turǵyzylǵan 5 bólmeli úi qalanyń shet jaǵynda, Nura eldimekeninde ornalassada, otbasy óz úiiniń bar bolǵanyna qýanyp otyr.
Baspana qiyndyǵyn bastan ótkizgen Gúlnur Rahymjanqyzynyń qýanyshynda shek joq. Óitkeni, endi el qatarly ómir súrip, balalarym qoǵamǵa paidaly azamat bolyp ósse deidi. Qýanyshtan kózine jas alǵan kópbalaly ana Dini basqarma qaiyrymdylyq aiasyndaǵy sharalardan qaldyrmai qoldaý kórsetip kele jatqanyn jetkizdi.
Óz sózin úige qalai qol jetkizgeninen bastaǵan ananyń kózinen qýanyshtyń nury anyq seziledi. Úili bolǵan ana balalar óz shańyraǵynan shyǵyp mektepge barǵanǵa qýanatynyn aitady.
«Imamdar kelip úi salyp beremiz degende qatty qýandym. Qýanyshty habardy balalarǵa kelip aitqanymda «ýaqytynda kóremiz ana, asyqpańyz» dedi. Biraq, úi salynyp bolǵan soń alǵash qonystanǵanymyzda balalardyń shattyǵynda shek bolǵan joq. Balalar óz úiinen shyǵyp mektepge barǵanǵa riza. Mektepke deiingi daiyndyq synybynda oqityn Ramazan esimdi balam jeksenbi kúni «erten sabaqqa baramyn» dep qatty qýanady. Budan asqan baqyt barma?! Bir aralyqta kúieýim aýyryp, tósekten tura almai qalǵanda qatty qinaldyq. 15 jyl páter jaldap turdyq. Izgi jandardyń demeýimen endi bári artta qaldy. Imandy, meiirimdi jandarǵa alǵys aitamyn», – deidi kópbalaly ana Gúlnur Rahymjanqyzy.
Bul otbasy úshin endi bári artta qaldy. Sebebi búginde ol jańa baspanaǵa qol jetkizip, qonys toiyn toilaýda. Tek qana baspana emes, otaǵasynyń aýyl sharýashylyǵymen shuǵyldanýǵa nieti baryn bilgen din qyzmetkerleri buzaýly siyr da satyp ápergen. Úi sharýasymen ainalysatyn otaǵasy 2-toptaǵy múgedek. Al, jubaiy Gúlnur Rahymjanqyzy qalada bir mekemede tazalyqshy bolyp jumys jasaidy. Endi din qyzmetkerleri kópbalaly anany jaqyn jerdegi mekemelerdiń birine turaqty jumysqa ornalastyryp bermek.
Nura eldimekeninde úi aýyz sý, jaryq sekildi másele óz sheshimin tapqan. Jańa qonysqa kóshken otaǵasy endi úiiniń aldyna qaqpa ornatýdy josparlap otyr. Úi úlken jolǵa jaqyn ornalasqan jáne mal sharýashylyǵymen shuǵyldanýǵa qolaily.
Igi sharaǵa Bas múftimen birge Talǵar aýdany, Nura aýyldyq okrýginiń ákimi Daniiar Kúngei, Almaty qalasynyń bas imamy Nurbek Esmaǵanbet, QMDB is basqarýshysy Erbosyn Oryn, «Zeket» qorynyń direktory Álisher Spanov qatysty.
