Merkide qaza tapqan 19 jastaǵy Madinanyń týystary istiń ádil ári jan-jaqty tergelýin talap etip otyr. Marqumnyń tátesi Mehrihannyń aitýynsha, Madina qaitys bolardan az ýaqyt buryn ajyrasýǵa ótinish berip, zattaryn jinap, kúieýinen ketýge daiyndalǵan, dep habarlaidy dalanews.kz.
CMN basylymynyń jazýynsha, týystary jas kelinshektiń ózine qol jumsaǵanyna senbeidi jáne onyń ólimine qatysty barlyq mán-jaidyń anyqtalýyn talap etedi.
Oqiǵa qalai bolǵan?
19 jastaǵy Madina Avezova 16 tamyzda Merkide qaitys boldy. Buǵan deiin BAQ-ta onyń otbasylyq janjaldan keiin ózine qol jumsaýy múmkin ekeni habarlanǵan.
Oqiǵa týraly alǵashqylardyń biri bolyp Madinanyń qurbysy Zeinep Threads jelisinde jazdy. Onyń aitýynsha, qaiǵyly jaǵdaidyń aldynda Madinany kúieýi Madiiar "Barni" biskvitine bailanysty týyndaǵan janjal kezinde urǵan.
Zeinep marqummen aradaǵy hat almasýdyń skrinshottaryn da jariialady. Onda Madina kúieýiniń táttini balasyna alyp kelgenin, ózi bireýin jep qoiǵannan keiin janjal bastalǵanyn aitqan. Keiin sózge enesi de aralasqan. Madinanyń jazýynsha, kúieýi anasyna dóreki jaýap berdi degen sebeppen ony urǵan.
Kóp uzamai Madina asylyp qalǵan kúiinde tabylǵany habarlandy. Politsiia "Ózin-ózi óltirýge deiin jetkizý" deregi boiynsha sotqa deiingi tergeýdi bastady. Alaida marqumnyń jaqyndary bul nusqamen kelispeidi.
Týystary Madinanyń denesin birden kóre almaǵan
Madinanyń tátesi Mehrihannyń sózinshe, qyzdyń qazasy týraly estigen anasy týystarymen birge Merkige barǵan. Ol kezde áieldiń jaǵdaiy óte aýyr bolǵan.
"Ol jylap turdy. Qoltyǵynan demep júrdi, esinen tanyp qala jazdady. "Madinany kórdiń be?" dep suradym. Ol bir sát qana kórgenin, kózin asha almaǵanyn aitty. Qolynan ustap, "Júr, ózimiz baryp kóremiz" dedim", – deidi Mehrihan.
Týysynyń aitýynsha, bastapqyda olardy máiitke jaqyndatqysy kelmegen. Soǵan qaramastan, Mehrihan ápkesimen birge ishke kirgen.
"Bizge "Kirmeńder, bizben birge kiresińder, ol endi bizdiki" degender boldy. Madinanyń kúieýin de, enesin de kórmedik. Bizge eshkim kóńil de aitpady", – deidi ol.
Mehrihan Madinanyń denesin ózi kórgenin aityp, onda kóptegen jaraqat belgileri bolǵanyn málimdedi. Bul – týysynyń sózi, jaraqattardyń naqty sipaty men paida bolý sebebin sot-meditsinalyq saraptama anyqtaýy tiis.
Otbasy qaita saraptama júrgizýdi talap etken
Madinanyń týystary onyń ózine qol jumsaǵany týraly nusqaǵa kúmán keltirip, tergeýshimen bailanysqan jáne qaita sot-meditsinalyq saraptama júrgizýdi talap etken.
Máiit morgqa jetkizilip, jaqyndary sonda tańǵa deiin qalǵan. Mehrihannyń aitýynsha, tek kelesi kúni ǵana Madinanyń denesin alyp kete alǵan.
Ol morg mańynda eki jaqtyń týystary arasynda janjal bolǵanyn da málimdedi.
"Morgtyń aldynda bizben urysyp, máiitti jerleýge bergisi kelmedi. Biraq zań boiynsha ony meniń ápkem ǵana ala alady. Bizge, kúieýime birneshe adam tap berdi. Olardyń týystary shamamen 20 kólikpen keldi. Tipti bireýi organdarda jumys isteitinin aityp, bizdi qorqytty. Soǵan qaramastan Madinanyń denesin Almatyǵa alyp kettik", – deidi áiel.
Mehrihannyń sózinshe, kúieýiniń týystary Madinany jaqyndaryna habarlamai, tezirek jerleýdi josparlaǵan.
"Olar ony tez jerlegisi kelgen. Aldymen túngi úshte, keiin beste, odan soń tańǵy jetide jerleýdi josparlapty. Jerin de qazyp qoiǵan. Madina keshki saǵat onda qaitys boldy. Tań atpai jerlemek bolǵan. Bizge habarlaǵan joq, ruqsat suramady", – deidi ol.
Týystary sot-meditsinalyq saraptamanyń túpkilikti qorytyndysyn kútip otyr.
"Ajyrasýǵa ótinish bergen"
Mehrihannyń aitýynsha, Madina qaitys bolardan buryn kúieýinen ketýge daiyndalǵan. Onyń sózinshe, Madinany 17 jasynda alyp qashqan. Sol kezde týystary qyzdy alyp ketýge barǵanymen, Madina ózi qalýǵa sheshim qabyldaǵan.
"Ol ony aldap kóndirdi. Biz artynan bardyq, biraq ózi qalǵysy keldi. Jas qoi, kóp nárseni túsinbedi. Qudalar toi da, qudalyq ta ótkizgen joq, tek betashar jasaldy", – deidi Mehrihan.
Týysynyń aitýynsha, erli-zaiypty arasynda buǵan deiin de birneshe ret janjal bolǵan. Kei kezderi Madina anasynyń úiine ketip qalyp, keiin kúieýi keshirim suraǵan soń qaita oralyp júrgen.
Mehrihan Madinanyń qaza bolǵan kúni AHAT bólimine baryp, nekeni buzý týraly ótinish bergenin aitady.
"Túste AHAT-qa baryp, ajyrasýǵa ótinish jazǵan. Ol muny bilip, Madinany urǵan. "Barni" tek syltaý bolǵan. Madina zattaryn da jinap, sýretin qurbysyna jibergen. Bul ózine qol jumsamaq bolǵan adamnyń áreketine uqsamaidy", – deidi týysy.
Madinanyń qurbysy Zeinep te qaiǵyly oqiǵadan bir kún buryn onyń Almatydan páter izdep, úi iesimen bailanysqanyn aitqan.
Qurbysy buǵan deiingi janjaldardyń kýási bolǵanyn aitady
Madinanyń tátesiniń sózinshe, Zeinep qurbysynyń úiine Merkige baryp, bir apta turǵan. Mehrihan sol kezde Zeinep Madinanyń kúieýinen jábir kórgenine kýá bolǵanyn málimdedi.
Onyń aitýynsha, jas otbasynyń qarjylyq jaǵdaiy da qiyn bolǵan. Madina anasyna habarlasyp, azyq-túlik pen turmystyq qajettilikterge aqsha surap otyrǵan.
Týysy sondai-aq Madinany anasyna qatysty máselelermen qorqytqanyn alǵa tartty. Budan bólek, Mehrihan Madinanyń júkti bolǵanyn, júktilik merzimi shamamen segiz apta bolǵanyn málimdedi. Onyń buryn da júktiligi úzilip qalǵanyn aityp, muny da zorlyq-zombylyqpen bailanystyrady. Alaida bul málimdemelerge qatysty resmi saraptama qorytyndysy jariialanǵan joq.
"Ol ómirdi jaqsy kóretin"
Mehrihan Madinany jerleýge daiyndaýǵa ózi qatysqanyn aitty. Onyń sózinshe, marqumnyń denesinde tyrnalǵan jáne kógergen jerler bolǵan, al shashyna shóp aralasyp qalǵan.
"Ony ózim jýyndyrdym, bárin óz kózimmen kórdim. Zeinepti shaqyryp, sýretke túsirýin ótindim. Denesi tyrnalǵan, shashy uiysyp, shóp aralasyp qalǵan. Arqasy shybyqpen urǵandai nemese súiregendei kórindi. Kúieý bala ony jipten túsirgennen keiin jerde súiregenin aityp otyr", – deidi Mehrihan.
Degenmen Madinanyń naqty neden qaitys bolǵanyn jáne denesindegi jaraqattardyń qalai paida bolǵanyn tergeý men sot-meditsinalyq saraptama anyqtaýy tiis.
Qazir marqumnyń otbasy istiń obektivti tergelip, kináli adam bolsa, zań aiasynda jaýapqa tartylýyn talap etip otyr.
"Bala solarda. Biz ol kezde balany oilaýǵa da shamamyz kelmedi. Bizge ádildik kerek. Kináli adam laiyqty jazasyn alsyn deimiz. Sodan keiin balany Madinanyń anasyna beredi. Ol zattaryn jinap, qurbysyna sýretin jiberip, artynsha ózine qol jumsaityn adam emes edi. Ol jańa ómir bastaǵysy keldi. Madina otbasyndaǵy jalǵyz qyz bolatyn. Anasy ony jalǵyz ósirdi", – dedi marqumnyń tátesi.
