Saryaǵashta jýrnalıser qadam basqan alǵashqy nysan aýdannyń Jibek joly aýyldyq okrýginde ornalasqan «Saryaǵash jer syıy» JSHS boldy. Jylyna 1 mln. danaǵa jýyq kóshet ósirip, ázirleıtin tuqymbaqtaǵy kóshetterdiń 250-300 myńy jemis aǵashtaryniki. Al jyldyq tabysy 90 mln. teńgeden asady. 2002 jyldan beri 96,5 ga aýmaqta túrli jemis-jıdekter men aǵash kóshetterin ósirýmen 50 shaqty jumysshy aınalysady.
Jyldyń 12 aıynda úzdiksiz jumys isteıtin «Saryaǵash jer syıy» JSHS-niń ózge tálimbaqtardan ereksheligi, tropıkalyq aımaqta ósiriletin jemis túrlerin ońtústik óńirine jersindirýde úlken tájirıbe jınaqtap otyr.
Búginde sharýashylyqta klımaty ystyq aptapta ósetin lımon, banan, kıvı sekildi birneshe jemis túrlerin ósirý tájirıbege engizilgen.
Aýdan boıynsha qazirgi tańda 1967,7 ga alqapta jemis-jıdekter ósirilip jatsa, onyń 351,8 gektar alqabynja jańa zamanaýı tehnologıa boıynsha túrli ónimder egilip, tamshylatyp sýarý ádisi arqyly jemis-jıdekter ósirilýde. Saryaǵashtaǵy osynaý 2 myń gektarǵa jýyq alqaptan byltyr 7,5 myń tonnadan astam ónim alyndy. Ortasha ónimdilik 55,3 sn/ga bolyp otyr.
Munan soń, tilshiler toby aýdandaǵy Kókterek kentiniń káriz júıeleri men shaıyndy sýlardy tazartý beketiniń búgingi ahýalymen tanysty. Aýdan ákimi Qaırat Ábdýálıev shıpajaıdaǵy jaǵdaıdy túsindirý maqsatynda sol mańdaǵy kásipkerlermen kezdesip, baspasóz konferensıasyn ótkizdi.
