Milliondar qalasynda myńdaǵan otbasyny jumyspen qamtyp otyrǵan Almatynyń bazarlary ekendigi esh daý týdyrmaidy. Ókinishke qarai, «Boroholka» daýy kúnnen-kúnge órshi túsýde. Almaty ákimdiginiń «aittym bitti, kestim úzildige» salyp, saýda kásipkerleriniń janaiqailaryna qulaq túrmeýi, tipti sot sheshimderin oryndaýǵa kelgende belden basýshylyq saiasat ustanýy máseleni daýsyz sheshýge emes, shoq-shoq daýdy qyzdyra túsýge beiildiligin ańǵartady deidi kásipkerler.
Keshe Almatyda «Almaty qalasy ákimdiginiń maqsaty ne? «Baraholkany» jańǵyrtý ma, jabý ma?» atty baspasóz jiyny ótti. Halyq arasynda «Baraholka» atanyp ketken birneshe bazardyń ókilderi 2015 jyldan beri júrgizilip kele jatqan modernizatsiialaý isiniń kem-ketikterin hám Almaty ákimdiginiń belden basýshylyq saiasatyn ashynyp aitty. Prezidentten arasha surap, úndeý jariialady.
Áýelde eks-ákim Baýyrjan Baibektiń kózi túsken «Rahat» bazary men «TKM» JShS ókilderi endi Dosaev ákimdiginiń qoldan jasaǵan kedergilerimen kúresip jatqandyǵyn aitty.
ALMATY QALASYNYŃ SOT BILIGINE TOLYQ SENIM ARTA ALMAIMYZ!
JAMILIa TÓLENOVA,
zańger, «TKM» JShS-niń ókili:
– Qarańyzdar, 2011 jylǵy 11 sáýirdegi sol kezdegi ákim Esimov qol qoiǵan qaýly. Almaty qalasyndaǵy keibir zirattardy jabý týraly qaýly. Munda Jetisý aýdanynda ornalasqan 5 zirat bar, sonyń ishinde «baraholkanyń» ainalasynda ornalasqan 2 zirat 2011 jyly jabylǵan.
Jabylǵan ziratpenen qurylys týraly zań talaptaryna sai araqashyqtyqta parametr ózgeredi. Ol jerde 300 metrdi saqtaýdyń qajeti joq. Jabyq zirattardyń tiziminde osy eki zirat bar – Rysqulov boiynda ornalasqan «Brodskii 132» ziraty. Aýmaǵy - 43 gektar 608 sotyq. Ekinshisi – «Dýbler» ziraty, aýmaǵy 12 gektar. Osy eki zirat mańynda 2021 jylǵy 18 qarashada qala ákiminiń qaýlysymen abatandyrýǵa berilgen 55 gektardan astam jer bar. Saýda obektileriniń keibiri osy zirattyń aýmaǵyna kirip ketken. Osynyń ortasyna skver kimge kerek?
56-57 gektarǵa jýyq jerge memlekettik biýdjetten qansha qarajat bólindi? 2021 jyly bul ziratqa abattandyrýǵa dep bergen kezde, memleketten qarjy bólingeni belgili.
3 mamyrda skverge berilgen jerge qaýly shyqty. Bas jospardyń bekitilgenin kútkeni kórinip tur. Aýdan ákiminiń orynbasary Ábdiqadyrov jer komissiiasy kezinde aitty: «Biýdjetten aqsha bólindi. Skver salynady», - dedi.
QAShANNAN BERI QUQYQ QORǴAÝ ORGANDARY JÁNE SOT JÚIESI ÁKIMDIKTIŃ QURYLYMYNA ENIP KETKEN?
Biýdjet aqshasynan quiturqy túrde skver salýǵa aqsha bólip otyrǵan aýdan ákimdigin jaýapqa tartatyn bilik bar ma? «Rahat» bazary boiynsha ótip jatqan sottardyń nátijesi boiynsha men Almaty qalasynyń sot biligine tolyq senim arta almaimyn. Olardyń áreketiniń bári kúmán týdyrady.
Qaladaǵy politsiia departamentiniń bastyǵy, general, kezdeýlerde ákimniń aldynda jas balasha ornynan atyp turyp, suraqqa jaýap beredi, óz kestesine túzetý engizedi. Qalanyń prokýrory da solai. Ákimniń shashbaýyn kóterip júredi. Prokýror men politsiia basshysy búkil eldiń aldynda ákimniń aitqanynan shyǵa almaitynyn dáleldep otyrǵan kezde, ádiletsizdik kórgen halyq kimge barý kerek? Qashannan beri quqyq qorǵaý organdary jáne sot júiesi ákimdiktiń qurylymyna enip ketken?
DAÝDYŃ ARASYNDA NAZARBAEVTYŃ «BAJASYNYŃ» ATY ATY ShYǴYP OTYR...
Bunyń báriniń zardabyn shegip otyrǵan bir «Rahat» qana emes, «Evraziia» bazary da bar. «Evraziia» bazary áýpirimdep júrip, qylmystyq is qozǵaltty. Ovsiannikov Máskeýde, dym bolmaǵandai biznesin júrgizip otyr.
Osy istiń artyn qazyp kelgende, Janteleev Dastan degen adam shyǵady. Qalalyq máslihatqa kandidat, burynǵy prezident Nazarbaevtyń «bajasy», Aqtoty Isabekovanyń jubaiy – sol kisiniń aty shyǵyp otyr.
Qazir materialdarmen tanysyp, adamdarmen kezdesken kezdegi bizdiń túigenimiz – «Evraziia» saýda úii Ovsiannikovtyń menshigine berilgen jerde tur ma, álde Janteleev siiaqty bilikke jaqyn adamdardyń menshigine ótip ketti me? Bunyń bárin qazbalap, tekseretin quqyq qorǵaý organy dármensiz. Bir ǵana familiia, «semianyń týysy» degen sóz qulaqqa tise, bári birden «paralich» kúige túsedi. Zań kim úshin qabyldanyp jatyr, sonda?
Qazaqstan Respýblikasynyń azamaty retinde, zańger retinde jáne bizge senim artyp otyrǵan «Rahat» jáne «Evraziia» saýda úii kásipkerleri atynan zań ústemdigin talap etemiz! Zań ústemdigi bolmai, bizdiń elde qansha jarnamalasaq ta ádildik ornamaidy!
Biz ótkenniń sarqynshaǵynan qutyla almai otyrmyz. Sebebi ol famiialiianyń bári bizdiń sanamyzǵa jattalyp qalǵan.
Sot biliginen qatań jaýaptylyqty suraimyz! Sot Konstitýtsiiany basshylyqqa ala otyryp, Qazaqstan Respýblikasynyń atynan sheshim shyǵarady. Olar ózderiniń jeke basyn kúittep, ákimdikke jaltaqtap, ózderiniń jaǵdailaryn jasaý úshin, páteri úshin solardyń aitqanyna kónýge májbúr bolatyn bolsa, bul eldiń erteńine kúmán bar.
Quqyq qorǵaý organdaryna qatysty da solai. Zańnyń aldynda bári birdei. Depýtattardyń saýalyna memlekettik organdardyń qalai jaýap berip otyrǵanyn kórip otyrmyz. Májilis depýtattary Baqytjan Bazarbek, Erlan Arystanbekov, Ermurat Bapidyń bergen suraýlaryna memlekettik organdardyń jai ǵana qaǵazdy aýdaryp, salǵyrt jaýap berip otyrǵandaryn kýálandyratyn qujattar bar. Depýtatty kózge ilmegen memlekettik organ halyqqa pysqyryp ta qaramaidy!
Sondyqtan biz QR Konstitýtsiiasynyń kepili – prezident Qasym-Jomart Toqaevtan arasha suraimyz! Sot biligi, atqarý jáne zań shyǵarýshy bilikterdiń arasyndaǵy shyrǵalańdy sheshýge, ádilettilikti ornatýǵa yqpal etýin suraimyz! Bizge Prezidentten basqa senetin eshkim qalǵan joq!
ÁKIMDIK BIZDIŃ TYNYSh JUMYS JASAÝYMYZǴA MÚMKINDIK BERSIN!
LÁZZAT KÓPERBAEVA,
«Rahat» bazarynyń kásipkeri:
– Biz 2018 jyldan bastap ákimdikpen sottasyp kelemiz. Sol jyly bizdiń turǵan jerimizdiń jalǵa alý merzimin uzartqysy kelmedi. Bizdiń turǵan territoriiamyz «zirat turǵan jerde, qyzyl zonada tur» degen jeleýmen bas tartty. Ol kezdegi ákim Baýyrjan Baibek bolatyn. Bir aptadan keiin ol bul jerge qurylys jumysyn júgizýge bolatynyn aityp, jihaz fabrikasyn salýǵa «SPS» JShS-ǵa berdi. Sonda «SPS-ke» qurylys salýǵa bolady eken de, bizge saýda jasap turýǵa bolmaidy eken?!
Bizdiń kásipkerler joldy japqysy keldi, kóterilgisi keldi. Biraq biz jinalyp, aqyldasyp, zań aiasynda óz quqyǵymyzdy qorǵaimyz dep sheshtik. Sodan beri sot jalǵasyp keledi.
Baibekti sotta jeńdik. Bizdiń jerimiz ózimizde qaldy. Endi, qazir Jetisý aýdanynyń ákimi Gúlnar Kókebaeva 4 jyl boiy sot júrip jatqanda buǵyp jatyp, aiaq astynan paida bolyp, bazardyń elektr jaryǵyn qiyp tastady. Biz óz aqshamyzǵa generator satyp alyp, jumys istei berdik.
Sońǵy ákimshilik sot ta bizdiń paidamyzǵa sheshti. Sot bul jerge skver salýǵa bolmaitynyn aitty. Biz taǵy qýandyq. Biraq ákimdik tarapynan bizge qatty qysym jasaý jalǵasyp jatyr. Biz salyqty tólep turmyz, memleketten eshteńe surap jatqan joqpyz. Tek bizdiń jerdi jaldaý ýaqytyn uzartsa dep suraimyz.
Qazir bazardy modernizatsiialaý týraly aityp jatyr. Biraq, «Evraziia» bazarynda ár kásipker 100 myń dollardan jinap berdi. Qazir sol aqsha qaida? Ovsiannikov qaida? Sonda bizdiń ákimdikke zań júrmei ma?
Biz osy bazarda 20 jyldan beri eńbek etip kelemiz. Bilik halyqtyń jaǵynda bolýy kerek! Ákimdikten tek qana qysym kórip kelemiz. Biz ákimdiktiń bizge tynyshtyq berýin, jerdi jalǵa alý merzimin uzartqanyn suraimyz. Biz sońyna deiin baramyz. Prezidentke de úndeý jasaimyz.
«EVRAZIIa» BAZARY KÁSIPKERLERINIŃ AQShASYN ALYP, QAShYP KETKENDER RESEIDE TÚK BOLMAǴANDAI JÚR!
SÁÝLE ABDÝLLINA,
«Evraziia» bazarynyń kásipkeri:
– Biz «Evraziia» bazarynda 30 jyldan beri jumys istep kelemiz. 1998 jyldan bastap «Evraziiada» Ovsiannikov Igor Nikolaevich, Tashimbetom Almabek Qalmyrzauly degen eki direktormen jumys istep keldik.
2014 jyly: «Modernizatsiia jasamasaq bolmaidy, bazardy ózgertýimiz kerek, sizder qurylysqa aqsha salasyzdar. Bizden – jer, sizderden – aqsha», - dedi. Ózderiniń 40 sotyq jerin kórsetti. Jospar, proektin kórsetti. Bárimidi shaqyryp, jinalys jasap, sharshy metri 2 myń dollardan satty. 20 sharshy metr jer alǵandar 40-50 myń dollar, 30 sharshy metr jer alǵandar 60-70 myń dollardan aqsha tóledi. 67 kásipker 4,5 mln dollar aqsha saldyq. Al Ovsiannikov aqshany qaltaǵa basyp, Qazaqstannan qashyp ketti. Biz sotqa shaǵym berdik. Ovsiannikovtyń ústinen is ashyldy. Qazir ol Reseide jatyr.
Sosyn 2022 jyly Tashimbetovten jón suradyq. Ol: «Sizderden negizi 5 jarym mln dollar aqsha jinaldy, «Evraziia» bazary 3,3 mln dollarǵa salyndy, qalǵan 2,2 mln dollardy Ovsiannikov Máskeýge áketip, restoran salyp aldy»,- dedi.
Tashimbetov qazir tergeýden qashyp júr. 2 myń dollardan aqsha alǵan adam qolymyzǵa karta berip ketti. Bizge eshkim tiispeitinine sendirip ketken. 7 jyldan keiin Ovsiannikov qashyp ketip otyr. Syrtymyzdan ǵimaratty satyp ketken. Jańa basshylyq 2023 jyly 15 qańtarda ǵimaratty bosatyp berińder dep otyr. Taǵy da biz, jeke kásipkerler dalada qalaiyn dep otyrmyz!
PREZIDENTEN ÚNDEÝ JASAIMYZ. SOTQA SENIM JOQ!
JÁNIBEK BAShANOV,
zańger:
– Bul baspasóz konferentsiiasynyń maqsaty – Prezidentke joldaý jasaý. Óitkeni Almaty qalasynyń ákimdigi zańdy da, sot sheshimin de oryndamai otyr. «TKM» kompaniiasynyń bul jerdi jalǵa alýynyń artyqshylyq quqyǵy bar. Sot solai sheshim shyǵarǵan. Biraq «TKM-niń» artyqshylyq quqyǵyn eskermei, úshinshi tulǵalarǵa jerdi berip otyr.
Biz búkil sotta jeńip otyrmyz. Jetisý aýdanynyń ákimdigi apelliatsiialyq shaǵymdy berdi jáne ekonomikalyq sotqa osy jerdi bosatý týraly talap-aryzdy berip otyr.
Almaty qalasynyń soty qandai sheshim qabyldaǵanyn bilmeimiz, sotqa senim joq. Ákimdikten halyqty shýlatpai, zańdy oryndaýyn talap etemiz.
«Evraziia» bazary boiynsha tergeý júrip jatyr, biraq kóńil tolmaidy. Áreń júrip jatyr. Tergeýdiń álsiz júrýine Dastan Janteleevtiń qatysy bolýy múmkin dep oilaimyn.
Túiin: «Baraholka» bazarynyń kásipkerleri, «Rahat» bazary saýdagerleri týraly portalymyzda osyǵan deiin ondaǵan material jaryq kórdi. Bul joly «Baraholkadaǵy» birneshe bazardyń kásipkerleri Prezidentten arasha suraýda.
«Baraholka» daýy Elbasizm kezindegi «barmaq basty, kóz qystylyqyń» bir ushtyǵy ǵana. Árbir menshik daýynyń ar jaǵyna tek aqsha ǵana emes, adam taǵdyry jatyr. Al «Baraholka» daýynda bir emes, myńdaǵan adamnyń taǵdyry talasqa túsýde. Jergilikti atqarýshy bilik átseli osyny bir sát oiǵa alsa deisiń...
Mezgil.kz
