Derekkózdiń aitýynsha, Baradar bosqyndar isine jaýap beretin Halil Rahman Hakkanimen kelispei qalǵan. Ekeýiniń arasyndaǵy kelispeýshilik daýǵa ulasqan. Baradar jańadan jasaqtalǵan úkimettiń qurylymy men quramyna kóńili tolmaǵan.
Negizgi daýdyń basy "Talibanǵa" jeńisti ápergen kim degen suraq tóńireginde órbigen. Baradar AQSh áskerin shyǵarý jónindegi Doha kelisimi jeńis ákeldi degen. Ol diplomatiia jeńdi degen.
Al "Hakkani jelisi" tobynyń jetekshisi Hakkani tálipterge jeńis ápergen qarýly ásker dep ataǵan.
Janjaldan keiin Baradar Kabýldan ketip, Qandaǵarǵa barǵan.
Tálipterdiń tarihynda alǵash ret AQSh prezidentimen tikelei kelissózder júrgen dál osy – Baradar bolatyn. 2020 jyly ol sol tustaǵy Aq úi basshysy Donald Tramppen telefon arqyly tildesken.
Buǵan deiin Baradar Amerikanyń joǵary laýazymdy tulǵalarymen Dohada júzdesken, soǵan sai AQSh áskeriniń Aýǵanstan aýmaǵyn tolyq tastap shyǵatyny týraly kelisimge qol qoiylǵan.
Baradarmen janjaldasyp qalǵan "Hakkani jelisi" toby Aýǵanstannyń áskerileri men onyń Batystaǵy odaqtastaryna qarsy qandy qyrǵyn uiymdastyrǵan uiym retinde tanymal. Kóptegen elderde bul top terrristik uiym retinde tanylǵan.
Top jetekshisi Siradjýddin Hakkani Aýǵanstannyń jańadan jasaqtalǵan Úkimetinde Ishki ister ministri bolyp taǵaiyndalǵan.
Osynyń aldynda birqatar basylymdarda Baradar janjaldan keiin aýyr jaraqat alyp, qaitys boldy degen aqparat jariialanǵan. Biraq 13 qyrkúiekte "Taliban" aýdiojazba taratty. Onda Baradardyń daýysy delingen adam óziniń ólgenin teriske shyǵarady.
Alaida áli resmi aqparat joq. Degenmen kóptegen aýǵandyqtar tálipterge senbeidi. Máselen 2015 jyly tálipter lideri molda Omardyń ólimin eki jyl boiy jasyryp keldi. Eki jyl boiy onyń atynan resmi málimdemeler taratylyp turǵan.
