Baqytjan Saǵyntaev óziniń Instagram-daǵy paraqshasynda Almatynyń taý klasteriniń týristik áleýetin damytýda eń bastysy týrister men alpinisterdiń qaýipsizdigi men jailylyǵy ekenin atap ótti.
Jumys sapary kezinde Almaty ákimi modýldik qurylym siiaqty úishikterdiń qalai qurastyrylyp jatqanyn tekserdi.
– Qyzǵylt sary tústi modýlderdiń ishi jylytý peshi, apattyq jaǵdaida qajet jinaqpen jabdyqtalǵan. Ishinde alǵashqy kómek kórsetý jinaǵy, marshrýt kartasy, mobildi qurylǵyny qýattaý stansasy, jyly kórpe men azyq-túlik jiyntyǵy bar. Shatyrda SOS spýtniktik signalyn qutqarýshylar pýltine jiberetin dabyl túimeleri bar radiorelelik dińgekter ornatylǵan, – dep jazdy Baqytjan Saǵyntaev.
Taýdaǵy qaýipsizdik sharalary sheńberinde Úlken Almaty men Tuiyq sý shatqaldarynda baqylaý-qutqarý pýnkti ashylady. Onda tikushaq alańyn ashý da josparda bar. «Shymbulaqta» qysqy maýsymǵa daiyndyq júrgizilýde – shańǵy trassalary men qonaq úi jańartylýda. Sondai-aq vizit-ortalyq ashylady.
Almaty ákimi Medeu Park Hotel-di qurý, jańartylǵan Qazaq Auyl ekokesheni men alpinisterdiń súiikti mekeni – Tuiyq sý shatqalyndaǵy glempingti qurý jobalarymen tanysty. «Medeýdiń» tómengi bóliginde arqany bar saiabaq pen densaýlyq joly salynýda.
