Ol jedel járdem de shaqyrmaǵan. Al Baian Esentaeva qansyraǵan kúii kúieýinen ózin óltirmeýin surap jalbarynǵan. Osylaisha oqiǵa ornyna olardyń qyzdary kelip jedel járdem shaqyrǵansha 45 minýt ótken. Bul jaiynda «QazAqparat» aqparat agenttiginiń Almaty oblysyndaǵy menshikti tilshisimen suhbattasqan qorǵaý organyndaǵy derek berýshi sotqa deiingi tergeý materialdaryna súiene otyryp habarlady.
«Áielder er adamdarǵa qaraǵanda tózimdi keledi. Máselen, áielder 1,5 litrǵa deiin qan joǵaltyp, keiin asyqpai qalpyna kele de alady. Al er azamattar 0,5 litr qan joǵaltsa eseńgirep qalar edi», — deidi QazAqparat agenttiginiń tilshisimen áńgimelesken quqyq júiesinde uzaq jyldar qyzmet etken derekkóz.
Onyń aitýynsha, Baian Esentaevany aýdandyq aýrýhanaǵa jetkizgennen soń, oǵan 3 saǵatqa jalǵasqan ota jasalǵan. Jaǵdaiy aýyr dep baǵalanyp, apparatta baqylaýda boldy. Al onyń kúieýi Baqytbek Esentaev Talǵar aýdandyq ishki ister basqarmasyna jetkizilgen.
Osy oqiǵa boiynsha QR Qylmystyq kodeksiniń 106, iaǵni «Adam densaýlyǵyna aýyr jaraqat salý» baby boiynsha qylmystyq is qozǵalyp, sotqa deiingi tergeýdi Talǵar aýdandyq ishki ister basqarmasynyń tergeý bóliminiń qyzmetkerleri júrgizdi. Alaida, keiinnen is Almaty oblystyq ishki ister departamenti arnaiy tergeýshilerine berilgen. Sonymen qatar, qylmystyq is «kisi óltirý úshin qastyndyq jasaý» babyna aýystyrylǵan.
«Barlyq tergeý jumystary júrgizildi. Baqytbek Esentaev jubaiymen birneshe ret betpe-bet kezdeskende tipti myń ret keshirim suraýǵa múmkindigi boldy. Al BAQ-ta jazylyp jatqannyń basym bóligi oidan shyǵarylǵan», — deidi bizdiń áńgimelesýshimiz.
Budan bólek, Baqytbek Esentaevtyń advokaty Bekbolat Jekseiitov qazir oǵan taǵylǵan «kisi óltirý úshin qastandyq jasaý» týraly aiypty Qylmystyq kodekstiń 106-babyna, iaǵni, áý bastaǵy «Densaýlyǵyna aýyr jaraqat salý» babyna aýystyrý úshin barynsha áreket etip jatyr.
Qazirgi kúni tergeý aiaqtaldy. Aiyptalýshyǵa QR Qylmystyq kodeksiniń 24-baby, 3-bólimi arqyly 99-baby 1-bólimine, iaǵni «Kisi óltirý úshin qastandyq jasaý» boiynsha aiyp taǵylǵan. Qylmystyq is Almaty oblysynyń qylmystyq ister jónindegi mamandandyrylǵan sotyna berildi. Sot protsesi Qaskeleń qalasyndaǵy №2 sotta ótýi múmkin.
