«Baldáýren» respýblikalyq oqý-saýyqtyrý ortalyǵy jazǵy demalysty uiymdastyrý sheńberinde halyqaralyq yntymaqtastyq aiasyn keńeitip keledi. Balalardyń demalysyn uiymdastyrýda mol tájiribesi bar ortalyq sheteldik balalardy da qabyldai otyryp, mádenietaralyq bailanystardy damytýǵa erekshe kóńil bóledi.
Ortalyq jumys istegen jyldar ishinde munda álemniń 15 elinen kelgen balalar demaldy. Sońǵy úsh jyldyń ózinde ǵana «Baldáýren» TMD elderinen, Qytai, Túrkiia, Ózbekstan, Qyrǵyzstan, Mońǵoliia jáne basqa da memleketterden kelgen 700-den astam sheteldik balany qabyldady.
3 maýsymda Qazaqstanǵa demalys pen ońaltýdan ótý úshin Ýkrainadan balalar toby keldi. Olar úshin bizdiń elimiz týraly tanymyn keńeitýge baǵyttalǵan birqatar is-sharalar josparlanǵan. Atap aitqanda, balalar «Býrabai» memlekettik ulttyq tabiǵi parkine ekskýrsiia jasap, Astana qalasyndaǵy kórnekti oryndarǵa saiahattaidy.
Mundai saparlar balalardyń oi-órisin keńeitip qana qoimai, mádenietaralyq túsinistik pen ózara qurmetti qalyptastyrýǵa, halyqtar arasyndaǵy dostyqty nyǵaitýǵa yqpal etedi.
Balalyq shaq — bul baqyt mekeni. Ony birlese qorǵaý jáne damytý — barshaǵa ortaq mindet.
Qazaqstan ár elden kelgen jas qonaqtarǵa esigin aiqara asha otyryp, halyqtar arasyndaǵy dostyqty qalyptastyrýǵa jáne senimge, qurmetke, jalpyadamzattyq qundylyqtarǵa negizdelgen álemniń negizin qalaityn jas urpaqty tárbieleýge óz úlesin qosyp keledi.
