Bankterge klientterdi onlain tekserý kezinde biometriiany qoldaný mindetteldi. Jańa erejeler baqylaýdy kúsheitip, kúdikti aqsha aýdarymdaryn buǵattaýǵa múmkindik beredi, dep habarlaidy Dalanews.kz.
Qazaqstanda qashyqtyqtan adam basyn tekserý erejeleri kúsheitildi. Endi bankter klientti tek kod nemese qoltańba boiynsha ǵana emes, sonymen qatar bet nemese saýsaq izderi siiaqty biometriialyq málimetter boiynsha da tekserýge mindetti. Buryn bankterdiń qalaýy boiynsha jasalatyn bul amal endi qatań talapqa ainalyp otyr. Bul týraly Qarjy naryǵyn retteý jáne damytý agenttiginiń jańa qaýlysynda qamtylǵan.
Endi shotty onlain ashý nemese kartany qaita basyp shyǵarý úshin bir SMS-kod jetkiliksiz bolmaq. Jańa erejelerge sáikes:
- bankter klienttiń fotosýretteri men videosyn arada bailanys úzilse de kem degende bes jyl saqtaýy kerek. Munyń alaiaqtyqpen kúreste septigi bar.
- qarjy uiymdary 21 jasqa tolmaǵan kazino men býkmekerlik keńselerge aqsha aýdarymyn jasa, ony buǵattaýy mindetti. Bul shekteý jastardy qumar oiyndardan jáne qarjylyq shyǵyndardan qorǵaý úshin engizildi.
Jańa sharalar Qazaqstanda jumys isteitin barlyq bankterge qatysty.
Sondai-aq elimizde tigilgen stavkalardy esepke qoiýshy biryńǵai júie engizilmek. Ol boiynsha Qazaqstanda bás tigýshilerdiń barlyǵyn onlain baqylaýǵa qol jetkiziledi. Bul, óz kezeginde, qumar oiynǵa jiberilmeýi tiis tulǵalardy anyqtaýǵa kómek bolady: sot sheshimimen qumar oiyndarǵa jiberilmeitinder, moinynda kóp qaryzy bar adamdar, memlekettik qyzmetkerler, áskeri qyzmetkerler, quqyq qorǵaý organdarynyń jáne arnaiy organ ókilderi jáne 21 jasqa tolmaǵandar.
