İshki ister mınıstrligi azamattardy jańa alaıaqtyq tásilinen saq bolýǵa shaqyrdy, dep habarlaıdy Dalanews.kz.
Alaıaqtar azamattarǵa qońyraý shalyp, ózderin memlekettik organnyń qyzmetkeri retinde tanystyrady. Olar "Salyq deklarasıasyn ýaqytyly tapsyrmaǵansyz" dep sendiredi. Osylaısha, bank shottaryńyz buǵattalýy múmkin ekenin aıtyp qorqytady. Máseleni úsh kún ishinde "sheshý qajet" degen syltaýmen qysym kórsetedi.
"Jeke basyńyzdy rastaý kerek" dep azamattardan SMS arqyly kelgen kodty suraıdy. Osy kodty alǵan soń, alaıaqtar bank shottaryna qol jetkizip, qarajatty zańsyz ıemdenedi.
Polısıa mańyzdy eskertý jasady:
- Memlekettik organ qyzmetkerleri mundaı mazmundaǵy qońyraýlar shalmaıdy jáne eshqashan SMS kodtar men rastaý derekterin suramaıdy;
- Eshqashan bógde adamdarǵa SMS kodtardy, bank kartasynyń nómiri men qupıa sózin, jeke málimetterdi bermeńiz;
- Eger kúdik týdyratyn qońyraý alsańyz, áńgimeni dereý toqtatyp, 102 nómiri arqyly polısıaǵa habarlasyńyz.
