OQO-daǵy Saryaǵash aýdanynda joǵary synyp oqýshylary zorlady delingen 7 jasar bala qazir ájesi jáne tátesimen birge Astanada.
QR bala quqyqtary jónindegi ýákil Zaǵipa Balieva 7 jasar búldirshiniń otbasyna qandai jaǵdaida baspana beriletinin túsindirdi, dep habarlaidy Sputnik Qazaqstan.
Búgin bala quqyqtary jónindegi ýákil Astanada arnaiy baspasóz máslihatyn ótkizip, 7 jasar balanyń oqiǵasyna qatysty suraqtarǵa jaýap berdi. Shara barysynda jýrnalister Balievadan balanyń otbasyna páter qandai baǵdarlamamen berilgeli jatqanyn surady.
"Men olarǵa bireý páter bergeli jatyr dep aitqan joqpyn.
Sizder bilesizder, Qazaqstanda ońtústikten soltústikke qonys aýdarý baǵdarlamasy bar.
Soǵan sáikes, kimde-kim soltústik óńirge kóshýge niet bildirse, olarǵa baspana men jumys usynylady. Múmkin sizder sony meńzep turǵan shyǵarsyzdar. Biz bul jóninde ájesi men tátesimen sóilestik. Olar usynysymyz týraly oilanyp kóretinin aitty", — dedi Balieva.
Balieva ájesi men balany poiyzdan túsirýge buiryq bermegenin aitty.
Sonymen qatar ol OQO-da zorlandy delingen 7 jasar bala anasyn saǵynyp júrgenin aitty.
"Olardyń aitýynsha, anasy Almatyda jumys isteidi. Bala bir ai boiy anasyn kórmegen. Ol anasyn saǵynyp júr, kúnde ol týraly suraidy. Biz birneshe ret anasyna habarlastyq, Astanaǵa kelýi úshin barlyǵyn jasaǵymyz keledi, alaida ázirge bul múmkin bolmai otyr", — dedi ol.
Balievanyń aitýynsha, ol áieldiń bailanys telefonyn tek birneshe kúnnen keiin ǵana tapqan.
"Ózimdi tanystyryp, balaǵa kómekteskimiz keletinin, onyń qasynda bolý úshin Astanaǵa kele alatynyn aittym. Alaida ol "mende aqsha joq" dedi.
Biz odan "biletti satyp alyp beremiz, tek kelseńiz boldy" dep ótindik.
Odan keiin onymen habarlasa almadyq, bul sońǵy áńgimemiz boldy", — dedi Balieva.
Eske salyp ótsek, úsh-tórt kún buryn otandyq BAQ betinde "Abai aýylyndaǵy mektepterdiń birinde 7 jasar balany joǵary synyp oqýshylary birneshe ret zorlaǵan" degen aqparat taraǵan edi.
Saryaǵash aýdanyna qarasty Abai aýylynda bar-joǵy birinshi synypta oqityn oqýshyny ózinen 7-8 jas úlken 4 oqýshy 5 ai boiy zorlap kelgen kórinedi.
Jábir kórdim degen bala bul týraly týystaryna byltyr tamyz aiynda aitqan eken. Sodan beri politseilerge neshe márte barǵanymen tártip saqshylary shaǵymdy tek qańtar aiynda qabyldapty.
Alaida sot-meditsinalyq saraptama qorytyndysy birinshi synyp oqýshysyna seksýaldy sipattaǵy zorlyq-zombylyq jasalǵanyn teriske shyǵardy.
Bala quqyqtary jónindegi ýákil Zaǵipa Balieva Shymkent qalasyna baryp, 7 jasar búldirshindi ájesimen birge Astanaǵa alyp keldi. Qazir balanyń jaǵdaiy jaqsy, onymen psihologtar jumys istep jatyr.
Keshe OQO ákimi Janseiit Túimebaev Saryaǵash aýdany, Abai aýylyndaǵy mektepte bolǵan keleńsiz jaǵdaiǵa bailanysty jaýapty tulǵalarǵa shara qoldandy. Atap aitsaq, QR zańyna sáikes oblys ákiminiń orynbasary U.Sádibekovke qatań eskertý berildi.
Sondai-aq, Saryaǵash aýdandyq jergilikti politsiia qyzmeti basshysy O.Berdaly men Saryaǵash aýdany, Abai aýyldyq jergilikti politsiia bólimshesiniń basshysy Á.Ibragimov, iývenaldy politsiia bólimshesiniń №73, №74 jalpy orta mektepterine jaýapty politsiia inspektory Q.Sáriev qyzmetinen bosatyldy.
