Balqash qalasynda týysy soqqyǵa jyqqan segiz jastaǵy balaǵa qatysty QR Qylmystyq kodeksiniń 120-baby 4-bóligi boiynsha (“Kámeletke tolmaǵanǵa qatysty jasalǵan zorlaý”) qylmystyq is qozǵaldy, dep habarlaidy Dalanews.kz.
Bul týraly “Za nami ýje vyehali” telegram arnasy málimdedi.
“Bul týraly balanyń anasy Instagram jelisindegi storisinde jariia etti. Onda ol ulyna qatysty qylmystyq is qozǵalǵanyn aitqan. Keiinirek atalǵan arna bul istiń naqty QR QK-niń 120-babynyń 4-bóligi boiynsha tirkelgenin anyqtady – bul kámeletke tolmaǵanǵa qatysty zorlaý baby”, – delingen habarlamada.
Sondai-aq buǵan deiin balany soqqyǵa jyqqan er adam onyń tórt jastaǵy qyzyna qatysty jasalǵan “jynystyq sipattaǵy áreketter” úshin osylai istegenin málimdegen.
Aita keteiik, buǵan deiin Balqash qalasynda jergilikti turǵyn Madina Dosymbekova "Qazaqmys" kompaniiasynyń qyzmetkerin segiz jasar ulyn aiaýsyz uryp-soǵyp, azaptady dep aiyptady.
Áieldiń aitýynsha, balaǵa jasalǵan áreket jai ǵana zorlyq-zombylyq emes, asa qatygezdikpen jasalǵan azaptaý bolyp tabylady.
"Meniń segiz jasar ulymdy aiaýsyz soqqyǵa jyǵyp, azaptady. Bul jai ǵana kúsh kórsetý emes, naǵyz qinaý áreketi boldy: balamnyń saýsaqtaryn syndyrǵan, basynan urǵan, denesin kúidirgen. Munyń bárin eresek er adam – "Qazaqmys" AQ-nyń qyzmetkeri jasaǵan", – deidi anasy áleýmettik jelide jariialaǵan beineúndeýinde.
Madina Dosymbekovanyń sózinshe, bul isti kúdiktiniń politsiia, aýrýhana jáne basqa da memlekettik organdardaǵy bailanystary arqyly jabýǵa tyrysyp jatyr. Sondyqtan ol ádildik ornaýy úshin istiń qoǵam nazarynan tys qalmaýyn talap etýde.
Qaraǵandy oblysy politsiia departamenti balany azaptaý faktisi boiynsha qylmystyq is qozǵalǵanyn rastady. Qazir tergeý jumystary bastalyp, sot-meditsinalyq saraptamalar taǵaiyndalǵan.
"Qazaqmys" kompaniiasy óz tarapynan jaǵdaiǵa alańdaýshylyq bildirip, tergeý amaldaryna tolyq qoldaý kórsetetinderin málimdedi.
"Kompaniia kez kelgen zorlyq-zombylyq áreketterin qatań aiyptaidy jáne mundai jaǵdailarǵa jol berýge bolmaidy dep esepteidi. Eger qyzmetkerimizdiń kinási dáleldense, ol zań aiasynda tiisti jazasyn alady", – delingen baspasóz qyzmetiniń málimdemesinde.
Eske sala keteiik, búgin sondai-aq Atyraýdaǵy jekemenshik balabaqshada úsh jasar qyz aýyr jaraqat alǵany týraly belgili boldy. Qyzdyń ata-anasynyń aitýynsha, balabaqsha qyzmetkerleri olarǵa baqylaý kamerasyndaǵy videojazbany kórsetpegen.
