Astanada Saniia Alimjanovanyń ólimine qatysty is boiynsha sot materialdardy qosymsha tergeýge qaitardy, dep habarlaidy Dala News.
Sýdia Aijan Kýlbaeva isti prokýratýraǵa qaita joldap, Erjan Imankýlovqa qatysty jańa sot-psihologiialyq jáne psihiatriialyq saraptama taǵaiyndaý týraly sheshim qabyldady.
Marqumnyń týystary bul sheshimdi ádil dep baǵalady.
«Biz muny kúttik. Qaita saraptama taǵaiyndalǵanyna qýanyshtymyn. Burynǵy saraptamalarda qaishylyqtar boldy. Sot barlyq dálelder men jaǵdailardy eskerdi. Endi is qaita qaralady», – dedi marqumnyń ápkesi Alýa Saidalina.
Is materialdaryna sáikes, oqiǵa Astanada bolǵan. Tergeý nusqasy boiynsha, Erjan Imankýlov birge turǵan áieline úiinde pyshaqpen shabýyl jasaǵan. Oqiǵa balalardyń kóz aldynda bolǵan.
Oqiǵadan keiin kúdikti óz-ózine qol jumsamaq bolyp, 25-qabattan sekirgen. Alaida ol aman qalyp, aýyr jaraqat alǵan, sonyń ishinde bas-mi jaraqaty tirkelgen.
Qazirgi ýaqytta ol mamandandyrylǵan psihiatriialyq mekemede em alyp jatyr jáne sot protsesine qatyspaidy.
Buǵan deiin sarapshylar Imankýlov qylmys kezinde psihikalyq kúizelis jaǵdaiynda bolǵan jáne óz áreketine esep bere almaǵan degen qorytyndy jasaǵan.
Alaida jábirlenýshi tarap bul pikirmen kelispeidi. Marqumnyń týystary kúdikti jaýapkershilikten jaltarý úshin psihikalyq jaǵdaiyn ádeii kórsetýi múmkin dep sanaidy.
Qaita taǵaiyndalǵan saraptama nátijesine qarai is boiynsha sheshim qabyldanady.
