Týva Respýblikasynyń astanasy Qyzyl qalasynda iz-túzsiz joǵalǵan eki mektep oqýshysyna qatysty jaǵdai ýshyǵyp ketti. Balgerdiń aitqanyna sengen júzdegen turǵyn tún ishinde qyzdardy osy úide ustap otyr degen kúdikpen bir záýlim úidi qorshaýǵa alyp, basyp kirýge áreket jasaǵan, dep habarlaidy dalanews.kz.
Amina men Ailana 1 shilde kúni keshki saǵat 17:00-18:00 shamasynda úilerinen serýendeýge shyqqan. Ekeýi Qyzyl qalasynyń shyǵys bóligindegi jeke turǵyn úi aýdanynda turǵan.
Qurbylar Enisei ózenine qarai bet alǵan. Ol jerde jergilikti turǵyndar jii shomylatyn shaǵyn jaǵajai bar. Alaida qyzdar sol kúii úilerine oralmaǵan.
Olardyń joǵalǵany týraly habar túskennen keiin politsiia, qutqarýshylar jáne eriktiler aýqymdy izdeý jumystaryn bastady.
Balgerdiń sózi júzdegen adamdy dúrliktirdi
Belgisizdik pen ata-analardyń aýyr kúizelisi saldarynan olardyń biri balgerge júgingen. Tývada mundai adamdardyń kómegine júginý jergilikti dástúrdiń bir bóligi sanalady. Keiin belgili bolǵandai, balger joǵalǵan qyzdar Qyzyldaǵy Kolhoznaia kóshesindegi bir úide ustalyp otyr dep boljam aitqan.
Alǵashynda týystary bul aqparattyń qaidan shyqqanyn jasyrǵan. Alaida 5 shildeden 6 shildege qaraǵan túni olar birneshe ondaǵan adammen birge atalǵan úige barǵan.
Az ýaqyttyń ishinde olarǵa kórshiler, tanystar jáne qalanyń ár aýdanynan kelgen turǵyndar qosylyp, júzdegen adamnan turatyn ashýly top qalyptasty.
Ashýly top úige basyp kirmek boldy
Jinalǵan jurt temir qaqpany uryp, qorshaýdan asyp kirýge áreket jasaǵan. Alaida úiden eshkim shyqpaǵan, terezelerdiń bári qarańǵy bolǵan.
Oqiǵa ornyna jetken politsiia qyzmetkerleri halyqty áreń toqtatqan. Keiin Tergeý komitetiniń qyzmetkerleri, arnaiy jasaq jáne Týva Ishki ister ministri de kelgen.
Sol kezde ashýly adamdar úige tas laqtyryp, terezelerdi syndyrǵan. Oqiǵa barysynda bir politsiia qyzmetkeri basynan jaraqat alǵan.
Ministr halyqty sabyrǵa shaqyrdy
Túngi saǵat 00:30 shamasynda Týva IIM basshysy Iýrii Zavialov oqiǵa ornyna kelip, kúdikti úidiń qyzdardyń joǵalýyna esh qatysy joq ekenin málimdedi.
Ol turǵyndardy taraýǵa jáne tańerteń izdeý jumystaryna qaita qosylýǵa shaqyrdy.
Sonymen birge qyzdar tabylǵanǵa deiin izdeý toqtatylmaitynyn aitty.
Úi tolyq tekserildi
Turǵyndardyń talabynan keiin kriminalister úige tolyq tekserý júrgizgen.
Kýágerlerdiń aitýynsha, mamandar ár bólmeni, jertóleni, jeldetkish júiesin, tońazytqyshtardy, jihazdardyń astyn qyzmettik itter men arnaiy quraldardyń kómegimen muqiiat qaraǵan.
Úidiń aýmaǵy 200 sharshy metrden asatyndyqtan, tekserý birneshe saǵatqa sozylǵan. Nátijesinde joǵalǵan qyzdarǵa qatysty eshqandai aiǵaq tabylmaǵan. Osydan keiin ǵana qyzdardyń týystary kúdikti úidiń mekenjaiyn ózderine balger aitqanyn moiyndaǵan.
Qazirgi ýaqytta Amina men Ailanany izdeý jumystary jalǵasyp jatyr. Tergeýshiler olardyń joǵalýyna qatysty barlyq yqtimal nusqany tekserýde.
