Qazaqstanda qosymsha bilim berý júiesin jetildirý aiasynda balalardy úiirmeler men sektsiialarǵa jazýǵa arnalǵan biryńǵai tsifrlyq platforma qurylyp jatyr, dep habarlaidy Dala news.
Mádeniet jáne aqparat ministri Aida Balaevanyń májilis depýtattaryna bergen jaýabyna sáikes, biryńǵai tásilderdi engizý, qarjylandyrýdyń ashyqtyǵyn qamtamasyz etý, qyzmet sapasy men qoljetimdiligin arttyrý maqsatynda 2025 jylǵy 1 maýsymnan bastap balalarǵa arnalǵan qosymsha bilim boiynsha Biryńǵai memlekettik tapsyrysty ornalastyrýdyń pilottyq jobasy iske asyrylýda.
Qujatta kórsetilgendei, elimizde 4 225 jalpy bilim beretin mektep pen 2 013 mektepten tys uiymdarda, onyń ishinde 433 mádeniet jáne sport uiymynda 3,5 mln bala qosymsha bilimmen qamtylǵan.
2021 jyldan beri balalarǵa arnalǵan memlekettik shyǵarmashylyq, sporttyq jáne bilim berý tapsyrystary júzege asyrylyp keledi. Jergilikti atqarýshy organdar qarjylandyrý kólemin, sharttaryn jáne basymdyqtaryn, sonyń ishinde vaýcher berý limiti men kezektiligin ózderi aiqyndaidy.
Mádeniet jáne aqparat ministri Aida Balaevanyń aitýynsha, biryńǵai tsifrlyq platforma vaýcherlik qarjylandyrýdyń ashyqtyǵyn arttyryp, ata-analarǵa úiirmeler men sektsiialardy tańdaý protsesin jeńildetedi.
2025 jyly bul baǵytqa 113,4 mlrd teńge bólingen (2023 jyly – 91,5 mlrd, 2024 jyly – 96,5 mlrd). Nátijesinde 497 myń bala úiirmeler men sektsiialarmen qamtylǵan.
Pilottyq joba alty óńirde – Aqmola, Qaraǵandy, Qyzylorda oblystarynda, sondai-aq Astana, Aqtóbe jáne Shymkent qalalarynda júzege asyrylyp jatyr jáne 2026 jylǵy qyrkúiekke deiin jalǵasady. Qarjylandyrý kólemi – 20,1 mlrd teńge.
Pilot aiasynda vaýcherlik qarjylandyrýdyń bytyrańqy tetikteri «bir bala – bir vaýcher» qaǵidaty boiynsha biryńǵai tsifrlyq ekojúiege biriktiriledi. Keiin platformany respýblika boiynsha keńeitý josparlanyp otyr.
