Taıaýda Qaraǵandy oblysy Temirtaý qalasy PB Shyǵys polısıa bólimine 36 jastaǵy qala turǵyny júgingen. Áıeldiń aıtýynsha, onyń 14 jastaǵy egiz uldary qaladaǵy saýyqtyrý uıymdarynyń birine jattyǵýǵa barǵan.
Balalar jattyǵý zalynan kıinetin bólmege oralǵanda kıimderi men sporttyq jabdyqtaryn belgisiz bireý urlap alyp ketkenin anyqtaǵan.
Shyǵyn somasy 50 myń teńgeni qurady. «22 sáýirde jedel-izdestirý sharalary barysynda krımınaldyq polısıa qyzmetkerleri 31 jastaǵy er adamdy ustady. Ol kinásin tolyq moıyndady. Zattaı dáleldemeler alyndy» dep málimdedi PD baspasóz qyzmeti.
Sotqa deıingi tergeý barysynda tártip saqshylary kúdiktiniń osyǵan uqsas taǵy úsh qylmysqa qatysy baryn anyqtaǵan. Onyń barlyǵy osy saýyqtyrý ortalyǵynda jasalǵan.
Máselen, 6 sáýirde qaskúnem baseınde júzip júrgen bir oqýshynyń joqtyǵyn paıdalanyp, sheshiný bólmesindegi shkaftardyń birinen balanyń uıaly telefonyn urlap ketken. Qoldy bolǵan telefonnyń quny – 129 myń teńge. Uryǵa qatysty QR QK 188-baby boıynsha qylmystyq is qozǵaldy.
