Almaty qalasyndaǵy oblystyq balalar úiin Konaev qalasyna kóshirý týraly biliktiń sheshimine qoǵam belsendileri men tárbielenýshiler taǵy da qarsylyq bildirdi. Bul joly olar Almatyda arnaiy baspasóz máslihatyn ótkizip, óz ýájderin aitty, dep habarlaidy Dalanews.kz KazTAG saityna silteme jasap.
Qoǵam belsendisi Iýliia Nesterova jańa mekenjaidyń qolaisyzdyǵyn naqty dálelmen túsindirdi.
"Bizde aerotúsirilim bar — balalar úiiniń jańa ornalasatyn jeri batpaqtyń ústinde ornalasqanyn anyq kórsetip tur. Burynǵy meken 10 gektar jerdi alyp jatqan, oǵan qosa umyt qalǵan demalys orny bar — taǵy 7,5 gektar. Al endi balalarǵa bar bolǵany 2 gektar ǵana jer berilmek. Onyń ózi batpaqty jerde. Bul ádildik pe? Burynǵy jer Almatynyń "altyn sharshy" dep atalatyn qymbat aýdanynda ornalasqan. Al qazirgi ǵimarat apatty dep aitylyp júrgenimen, bul jalǵan aqparat. Balalar úiinen tárbielenýshilerdi shyǵaryp jibergen, al ǵimaratta eshqandai jóndeý jumystary júrgizilip jatqan joq", — deidi ol.
Nesterovanyń aitýynsha, jańa ǵimarattyń tóńiregi qaýipti — batpaq pen qamystyń ortasynda ornalasqan.
"Qonaevta jyl saiyn qamys órtenedi. Al ondaǵy balalardyń ishinde minezi kúrdeli, tártibi qiyn balalar bar. Olar qashyp ketip, batpaqta batyp ketýi de múmkin. Biraq bul qaýip týraly eshkim oilap jatqan joq", — dep alańdaýshylyq bildirdi qoǵam belsendisi.
Sonymen qatar balalar úiiniń basqa qalaǵa kóshirilýi onda tárbielenip shyqqan túlekterge de aýyr tiedi. Qazir kóptegen túlek jazǵy demalys kezinde kolledj nemese ýniversitet jataqhanalary jabylǵanda, qaitadan balalar úiine kelip panalaidy.
"Eger balalar úii jabylsa, bul túlekter qaida barady? Olar úisiz qalýy múmkin. Kópshiliginiń otbasylyq baspanasy joq, al alatyn shákirtaqysy 40 myń teńge ǵana", — deidi Nesterova.
10 shildede resmi túrde KMM "Arnaýly áleýmettik qyzmetterdi qajet etetin balalardy qoldaý oblystyq ortalyǵynyń" jańa mekenjaiǵa aýystyrylǵany týraly buiryq shyqty. Qujatqa sáikes, balalar úii Konaev qalasy, Qonaev dańǵyly 33/4 mekenjaiyna kóshiriledi.
Balalar úiiniń ákimshiligi men tárbielenýshiler bul sheshimge qarsy shyǵyp, prokýratýra men Almaty qalasy ákimdigine, Bilim ministrligine, Bala quqyqtary jónindegi ýákilge jáne Básekelestikti qorǵaý jáne damytý agenttigine resmi aryz joldaǵan. Olar balalardyń quqyǵyn qorǵaýdy, balalar úiiniń qazirgi ornynda qalýyn, ǵimarat pen demalys aimaǵyna kúrdeli jóndeý júrgizip, áleýmettik maqsatty saqtaýdy, sondai-aq bul mekemege «úlgili balalar úii» mártebesin berýdi suraidy. Óitkeni bul mártebe qosymsha qoldaý men memlekettik baqylaý múmkindigin beredi.
