Oqý-aǵartý ministrliginiń keńeitilgen alqa otyrysynda balalardyń quqyǵyn qorǵaý salasyndaǵy memlekettik saiasatty iske asyrý máselelerine erekshe nazar aýdaryldy, dep habarlaidy Dalanews.kz.
Memleket basshysynyń tapsyrmasymen alǵash ret 2026-2030 jyldarǵa arnalǵan "Qazaqstan balalary" tujyrymdamasy ázirlendi. Qujat qoldanystaǵy sharalar men baǵdarlamalardy tutas júiege biriktiredi.
"Tujyrymdamanyń negizgi maqsaty – árbir balanyń bilim alý, densaýlyǵyn saqtaý, áleýmettik qorǵalý jáne otbasynda tárbielený quqyqtaryn qamtamasyz etetin júieli ári úilestirilgen tásildi qalyptastyrý. Osy maqsatqa qol jetkizý úshin qujat balalardyń qaýipsizdigin kúsheitýge, psihologiialyq jáne áleýmettik qoldaý júiesin jetildirýge, sondai-aq, vedomstvoaralyq úilestirýdi nyǵaitýǵa baǵyttalǵan", - dedi Juldyz Súleimenova.
Búginde elimizde 6 902 492 bala turady, bul - halyq sanynyń úshten biri. Keiingi 10 jylda balalar sany shamamen 1,5 millionǵa artty. Bul infraqurylym men qoldaý júiesin odan ári nyǵaitýdy talap etedi.
Memleket basshysynyń tapsyrmalaryn iske asyrý aiasynda balalardyń quqyqtaryn qorǵaýdy kúsheitýge jáne zorlyq-zombylyqqa nóldik tózimdilik printsipin engizýge baǵyttalǵan 10 zań qabyldandy. 2025 jyly zańnamaǵa balalardyń quqyqtaryn buzǵany úshin ákimshilik jaýapkershilikti bekitetin qosymsha ózgerister engizildi. 237 myńnan astam bala psihologiialyq-meditsinalyq-pedagogikalyq qoldaýmen qamtylǵan, onyń ishinde shamamen 17 myń bala úide bilim alady. Bilim berý uiymdarynda 3,8 myń pedagog-assistent jáne 10 myńnan astam arnaiy pedagog jumys isteidi.
Balalardyń tamaqtanýy men sanitariialyq qaýipsizdigine erekshe kóńil bólinýde. Mekteptegi tamaqtanýdyń jańa standarty engizilip, ónim sapasy men sanitariialyq talaptardyń saqtalýyna baqylaý kúsheitildi. Mektepke deiingi bilim berý salasynda «Aqsha balaǵa beriledi» qaǵidaty boiynsha vaýcherlik qarjylandyrý engizildi. Bul tetik kezekti eki esege qysqartýǵa jáne 21 mlrd teńgeden astam qarajatty únemdeýge múmkindik berdi. Elimizde 11 900 balabaqsha jumys isteidi, onda shamamen 1 million bala tárbielenýde, al mektepke deiingi synyptarda 163 myńnan astam bala bilim alýda.
"Qazaqstan balalary" tujyrymdamasyn iske asyrý balalar saiasatyn júieli damytýǵa jáne árbir bala úshin teń múmkindikter qalyptastyrýǵa baǵyttalǵan.
