«Kelesi aýqymdy baǵyty – jastar jáne otbasy saiasaty. Resmi statistika boiynsha qazir elimizde 3 million 765 myń jastar ókili bar. Bul - halyqtyń 20,4 paiyzy. 500-den astam jastar uiymy qyzmet etedi. Ókinishke orai, byltyrǵy pandemiia shekteýlerine bailanysty birqatar joba toqtatylǵan bolatyn. Birazy onlain formatqa aýystyryldy. Dese de, negizgi josparly jumys saqtalyp 22 áleýmettik joba iske asty. Onyń aiasynda 300 myńnan astam adamdy qamtyǵan, 200-den astam is-shara uiymdastyryldy», - dedi ol halyqqa esep berý kezdesýinde.
Ministrdiń atap ótýinshe, bul kezeńdegi jumysta negizinen aqparattyq-keńes berýge basymdyq berildi. Jastardy qoldaýǵa arnalǵan túrli memlekettik baǵdarlamalar, jobalar men bastamalar boiynsha 11 million adamǵa keshendi aqparattyq-túsindirý jumystary júrgizildi. Qazirgi tańda jastar jáne otbasy saiasaty baǵytynda 12 grant jobasy oryndalýda. Jyl aiaǵyna deiin taǵy 12 joba iske qosylady. Sonymen qatar, biyl «Táýelsizdik urpaqtary» túrli saladaǵy talantty jastardy qoldaýǵa arnalǵan 30 grant jobasyn usyný josparlanyp otyr.
«2020 jyly Jastar jylynyń jol kartasy aiasynda Nur-Sultan, Almaty, Shymkent qalalaryndaǵy jumysshy jastar 1 myńnan jaldamaly páterge qol jetkizdi. 2021 jyly taǵy 3 myń páter beriledi. Byltyrǵy eseptik kezdesýde «Jastardy qoldaýdyń 2025 jylǵa deiingi keshendi jospary» ázirlenip jatqany aitylǵan bolatyn. Sapaly bilim, turǵyn úi, jumyspen qamtý, mádeni-rýhani qoldaý syndy 10 negizgi baǵyttan turatyn jospar búginde tolyq qabyldanyp, naqty iske asyp jatyr», - dedi Aida Balaeva.
Sonymen qatar ol jastar saiasaty saladaǵy máselelerge de toqtaldy.
«Sońǵy zertteýler nátijesi – jastar arasynda úsh negizgi máseleniń ózektiligin anyqtady. Atap aitqanda: sapaly bilim, jumyspen qamtý jáne turǵyn úi. Iaǵni, júieli túrde sheshýdi talap etetin suraqtar.
Al bul óz kezeginde strategiialyq qujattar keshenin qabyldaýdy kózdeidi. Birinshi - «Memlekettik jastar saiasaty máseleleri boiynsha keibir zańnamalyq aktilerge ózgerister engizý týraly» zań jobasy. Onyń aiasynda «Jastar damýynyń indeksi», «NEET» jastar kategoriiasy» siiaqty jańa uǵymdar zańmen bekitiletin bolady. Ekinshi - «Táýelsizdik urpaqtary» ulttyq jobasy. El táýelsizdiginiń 30 jyldyǵy aiasynda Memleket Basshysy jastar saiasaty salasyndaǵy barlyq baǵdarlamany tutas bir ulttyq jobaǵa biriktirýdi tapsyrǵan bolatyn. Búginge deiin barlyq óńirde qoǵamdyq tyńdaýlar ótip, 100 den astam usynys jobaǵa engizildi», - dedi ministr.
Aida Balaeva atalǵan qujat jastar saiasaty salasynda barlyq memlekettik organdardyń jumysyn bir júiege keltirip, ideologiialyq baǵyttan – bazalyq qajettilikke deiingi máselelerdi qamtitynyn basa aitty.
«Sondai-aq, «NEET» jastar kategoriiasymen jumys jóninde Respýblikalyq jobalyq keńse jumysyn bastady. Onyń aiasynda, osy kategoriiadaǵy jastardyń biryńǵai málimet bazasyn qurý, aqparattyq-túsindirý jumystaryn kúsheitý, naqty usynystar ázirleý jáne adrestik jumys bólimderin ashý kózdelip otyr», - dedi ol.
Derekkóz: ult.kz
