Prezident Qasym-Jomart Toqaev barlyq deńgeidegi máslihat depýtattarynyń II respýblikalyq forýmynda balalardyń qaýipsizdigi máselesine qatysty pikir bildirdi,- dep habarlaidy Dalanews.kz.
Toqaev balalardyń qaýipsizdigin qamtamasyz etý, quqyqtaryn qorǵaý, olardyń jan-jaqty damýy úshin qolaily jaǵdai jasaý – memlekettik saiasattyń eń basty basymdyǵy ekenin málimdedi.
"Salalyq ministrlik bolsyn, ákimdik nemese quqyq qorǵaý qurylymy bolsyn, ýákiletti organdardyń bári óz qyzmetin múltiksiz oryndap, jumysyn úilestirýi kerek. Baqytty balalyqtyń negizi otbasy institýty ekenin jáne solai bolyp qala beretinin túsingen jón.
Bizdiń qoǵam qazir betpe-bet kelgen kóptegen másele men keseldiń túp-tamyry ata-analardyń bala tárbiesine óz deńgeiinde aralaspaýynan bastalady. Urpaqtyń tsifrlyq dúnielerge táýeldi bolýy men virtýaldy álemge shekten tys qumartýy naǵyz dertke ainaldy. Balalarǵa qatysty kez kelgen qaiǵyly jaǵdai meniń janyma batady. Memlekettik organdardyń nazaryn dereý osyndai jaǵdailarǵa aýdaryp, tiisti tapsyrmalar berip, oryndalýyn turaqty baqylaýymda ustaimyn.
Sóz joq, zamanaýi tehnologiialar damýǵa dańǵyl jol ashady, sondai-aq ómirimizge aitarlyqtai qaýip te tóndiredi. Tanymal áleýmettik jeliler balalardy ǵana emes, úlkenderdi de zombige ainaldyrýy múmkin. Ata-analar balalarynyń tárbiesin memleketke nemese mektepke ysyra salmaýy kerek. Gadjetterdiń qursaýynda qaldyrýǵa tipti bolmaidy. Balalaryna tsifrlyq gigienanyń qarapaiym erejelerin úiretýge ata-ana jaýapty. Ul-qyzdarymyzǵa kóńil bólý, birge ýaqyt ótkizý, olardy alańdatqan máseleler jaiynda áńgimelesý mańyzdy. Balanyń smartfon nemese kompiýter paidalanǵan kezinde ne istep jatqanyn qatań qadaǵalaý qajet", - dedi Prezident.
