Áleýmettik jelilerde burynǵy Almaty ákimi Baýyrjan Baibekke qatysty aqparat qaita qyzý talqylanyp jatyr. Bul joly onyń esimi Aqmola oblysynda iske qosylǵan iri óndiristik jobamen bailanystyrylyp, qoǵamda túrli kúmán men suraq týǵyzdy, dep habarlaidy dalanews.kz elmedia.kz-ke silteme jasap.
Jelide taraǵan málimetterge súiensek, 2026 jyldyń sáýir aiynda Aqmola oblysynyń Zerendi aýdanynda “Qazaq Kaolin” JShS-niń taý-ken baiytý kombinaty tehnikalyq iske qosylǵan. Joba Alekseev ken orny bazasynda júzege asyrylyp jatyr.
Kásiporynda nemistiń AKW kompaniiasynyń zamanaýi jabdyqtary ornatylǵany aitylǵan. Al óndiristiń bolashaq qýaty jylyna 230 myń tonna shikizat óńdeýge jetpek. Jobanyń jalpy investitsiia kólemi shamamen 12 mlrd teńge dep kórsetilgen. Kombinattyń tolyq iske qosylýy 2026 jyldyń shildesine josparlanǵan.
Jelide taraǵan málimetterde kásiporyn quryltaishylary qatarynda Baibek áýletine jaqyn adamdar bar ekeni aitylady. Atap aitqanda, quryltaishylar retinde 86 jastaǵy Qydyrǵali Baibek pen 26 jastaǵy Bekzat Kerimbaidyń esimderi kórsetilgen.
Sondai-aq Bekzat Kerimbaidyń Aray Media Group qoryn basqaratyny, al bul uiymdy Baibektiń týysy Aigúl Baibek qurǵany týraly málimetter keltirilgen. Biraq atalǵan kompaniianyń keiingi jyldary belsendi qyzmeti baiqalmaǵany da aitylǵan.
Jazba avtorlary budan buryn “Qazaq Kaolin” kompaniiasyn basqarǵan tulǵalar qatarynda Timýr Ábilov bolǵanyn, onyń da Baibekpen burynnan bailanysy bar ekenin alǵa tartady. Sonymen qatar Baibektiń ózi shetelde túrli qyzmet atqarǵany, onyń ishinde Japoniiadaǵy kompaniialardyń birinde keńesshi bolǵany jóninde de aqparat keltirilgen.
2025 jyldyń jeltoqsanynda Baibektiń kompaniia direktorlar keńesiniń tóraǵasy bolǵany týraly derek te jariialanǵan. Avtorlar muny “bizneske ashyq oralý” dep baǵalaǵan.
Kúmán men pikirler
Áleýmettik jelidegi jazbada jobaǵa salynǵan 12 mlrd teńgeniń qaidan kelgeni týraly suraq týyndady. Avtorlar bul qarajattyń shyǵý tegi qoǵam úshin mańyzdy másele ekenin alǵa tartady.
Sondai-aq Baibek ákim bolǵan jyldary onyń otbasynyń qarjylai múmkindigi artqany týraly da túrli boljam aitylǵan. Jazbada Almatydaǵy elitalyq turǵyn úiden páter alynǵany jóninde de mysal keltiriledi.
Keibir pikirlerde qazirgi óndiristik jobalar arqyly burynǵy aktivter “zańdastyrylyp jatyr” degen kúdik te aitylady. Alaida bul tujyrymdar resmi túrde dáleldenbegen jáne tek áleýmettik jelidegi avtorlyq pikir sanatyna jatady.
Qazirgi ýaqytta “Qazaq Kaolin” jobasyna jáne oǵan qatysy bar tulǵalarǵa qatysty resmi organdar tarapynan naqty túsinikteme jariialanǵan joq.
