Belgili prodiýser Baian Alagózovanyń áleýmettik jelidegi dinge qatysty pikirine bailanysty quqyq qorǵaý organdaryna shaǵym tústi, dep habarlaidy dalanews.kz.
Ótinish iesi prodiýserdiń Threads jelisindegi jariialanymdaryn tekserip, olarǵa quqyqtyq baǵa berýdi suraǵan. Onyń pikirinshe, atalǵan jazbalarda dindarlardy kemsitetin jáne qorlaityn tujyrymdar bolýy múmkin.
"Threads áleýmettik jelisindegi @bayanmaxatkyzy akkaýntynda jariialanǵan jazbalarǵa tekserý júrgizip, quqyqtyq baǵa berýdi suraimyn. Avtor din men dindarlar týraly kópshilik aldynda kemsitetin jáne qorlaityn sózder qoldanady dep esepteimin", – delingen shaǵymda.
Ótinishte Baian Alagózovanyń dini nasihattan sharshaǵanyn aityp, jumaq pen tozaqtyń bar ekenine senbeitinin jazǵany kórsetilgen. Sondai-aq prodiýserdiń jumaqta er adamdardy «72 hor qyzy kútedi» degen túsinikke mysqylmen qaraǵany aitylǵan.
Shaǵym iesi prodiýserdiń jariia málimdemelerinde dinaralyq arazdyqty qozdyrý belgileriniń bar-joǵyn anyqtaýdy surap otyr.
Qazirgi ýaqytta elektrondy ótinish tirkeý satysynda tur. Ázirge tekserýdiń bastalǵany nemese is qozǵalǵany týraly resmi aqparat joq.
